Hougaard kry lof en bedank Fourie
2010-08-30 09:23
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Pretoria - Fourie du Preez kan weliswaar nie tans vir die Springbokke speel nie, maar het steeds Saterdag ’n aandeel in Suid-Afrika se sege oor die Wallabies op Loftus Versfeld gehad.
Die beseerde Bok nr. 9 het die tweede Saterdag agtereenvolgens vir Francois Hougaard vooraf raad gegee en die jongeling was weereens ’n uitblinker.
“Ons het weer voor die wedstryd gaan koffie drink en gesels oor wat ek moet doen. Fourie help my ongelooflik baie. Hy is ’n puik ou op én van die veld af,” het Hougaard, wat as speler van die wedstryd aangewys is, gesê.
Die 22-jarige skrumskakel het ’n skeppende hand in drie van die Bokke se vyf drieë gehad en ook in die tweede helfte met ’n groot doodvat op Adam Ashley-Cooper gekeer dat die Aussies ’n drie druk wat die wedstryd in hul guns kon swaai.
Hougaard se vertoning het selfs ná die wedstryd ’n pluimpie van sy regstreekse teenstander, Will Genia, ontlok.
“Francois het baie groot skoene om nou vol te staan en verrig die taak goed,” het die Wallaby-skrumskakel gesê.
Hougaard beskou die toets as die hoogtepunt van sy kort loopbaan tot op hede, maar was steeds nie tevrede met sy vertoning nie.
“Ek het met ’n swak skop begin en dit het die eerste Wallaby-drie tot gevolg gehad.
“My skopwerk was swak, maar my aangewerk en besluitneming was beter as die vorige week.”
Wat was sy gunsteling-oomblik van die toets?
“Ek sou sê daardie laaste breekslag toe ek vir Pierre (Spies) weggestuur het en JP (Pietersen) gaan druk het. Ek het toe geweet daar is nie meer tyd vir die Wallabies om terug te kom en nog ’n drie te druk nie,” het Hougaard gesê.
“Dié toets is bo-aan my lys van hoogtepunte. Dit was baie spesiaal en ek het nooit gedink ek sou die speler van die wedstryd wees nie. Dis spesiaal om die speler van die wedstryd te wees, veral op Loftus Versfeld en in Victor Matfield se 100ste toets.”
Volgens Hougaard was die sleutel eenvoudig om kalm te bly toe die Wallabies twee drieë binne die eerste vyf minute druk.
Die span het ook ná vier nederlae agtereenvolgens besluit om Saterdag se toets ’n nuwe begin te maak.
“Ons het gesê ‘wat gebeur het, het gebeur’. Ons gaan vorentoe kyk.
“Dit was belangrik om dit op ’n positiewe noot af te skop. Dit sal baie vir ons selfvertroue beteken.”
- Sport24
- Volg Nuus24 Sport op Twitter. Kliek hier.
- Die Burger