‘Het hulle dan al trofee gelig?’
2011-08-26 08:54
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Melbourne. – Die All Black-afrigter, Graham Henry, het die Wallabies ekstra motivering gegee voor Saterdag se beslissende kragmeting in die Drienasies-rugbyreeks.
Omring deur ’n horde verslaggewers Donderdag in Brisbane, het dié 65-jarige voormalige skoolhoof gevra: “Het hulle hom (die trofee) al ooit omhoog gehou?”
Toe hy herinner is dat die Wallabies in 2000 en 2001 geseëvier het, het Henry opreg verbaas gelyk. “Ek vra om verskoning. So, hulle hét dit al gedoen.”
Die kampioen, Nieu-Seeland, het ’n kans om sy 11de Drienasies-titel te verower voor albei spanne se laaste wedstryd voor aanstaande maand se Wêreldbeker-toernooi.
Die All Blacks het die Aussies met 30-14 geklop in die eerste ronde van die Drienasies op Eden Park in Auckland. Hulle het nou ’n bykans volsterkte span aangekondig om die naasbeste span ter wêreld te pak.
Die Aussie-stut Ben Alexander wou niks sê op die vraag of Henry so ver as 1987 kan onthou nie, die enigste jaar dat die All Blacks die Wêreldbeker gewen het.
Vir die jongste sportnuus volg Nuus24Sport op Twitter.
– Sport24