Gevaarligte helderrooi vir Bok-rugby
2010-09-07 07:30
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Kaapstad – Die gewese Springbok-afrigter Jake White glo die gevaarligte brand helder vir Bok-rugby.
“Die eerste, in hoofletters, is verdediging,” het White gister gesê nadat die Bokke ook Saterdag se Drienasies-toets in Bloemfontein teen Australië verloor het.
“Ons het in 2004 met opskietverdediging begin en was leiers in wêreldrugby.
Ander lande het ons verdediging begin naboots.
Suid-Afrika het Saterdag in ’n kritieke toets binne 25 minute vier drieë afgestaan.
“Ek glo Suid-Afrika moet hou by wat vir hom werk, maar terselfdertyd innoverend wees. Ek sien ook nie subtiele veranderinge in ons aanvallende spel nie. Dis goed en wel om baie ervaring te hê, maar jy moet steeds met nuwe idees vorendag kom.”
White is ook bekommerd dat spelers te veel mag in die huidige Bok-opset het.
Hy glo die feit dat sommige spelers se aandag nie ten volle by rugby is nie, hul spelpeil negatief beïnvloed.
“Daar is ’n fyn lyn tussen ’n speler-gedrewe stelsel en speler-bemagtiging.
Die spelers is moontlik in ’n gemaksone,” sê White.
“Ek sien spelers te veel in advertensies en hoor van allerlei sakebelange. Wat speler-bemagtiging betref, is dit ideaal om spelers ’n inset in die wedstrydplan te gee, maar die afrigter moet steeds leiding gee en moeilike besluite neem.”
White glo die Bokke loop die gevaar om reaktief te wees.
Die geleentheid was volgens hom daar om ná verlede jaar se sege in die Drienasies-reeks pro-aktief te wees en ’n paar jonger spelers op die Europese toer in 2009 te stuur.“Daar is die afgelope drie jaar nie ’n enkele moeilike besluit geneem nie.
Dis moeilik om te verander, want dit dwing jou om moeilike besluite te neem.
“Die persepsie bestaan dat Suid-Afrika nie sy speelstyl vanjaar aangepas het nie, maar die statistieke wys vir jou ons skop twee keer minder as verlede jaar. Ons hét aangepas.
“Nieu-Seeland skop meer, maar druk steeds vier drieë per wedstryd. Ons moet hou by die beginsels wat vir ons werk, want ons wil immers nie Nieu-Seeland, Australië, Wallis of Fidji wees nie.”
White is ook bekommerd oor die selfvertroue wat Australië se jong spelers uit Saterdag se sege gaan put.
“Manne soos Kurtley Beale en James O’Connor gaan begin dink hulle kan enigiemand klop as hulle vir John Smit en Victor Matfield in Suid-Afrika verslaan.”
White glo ook die Bokke put nog baie waarde uit Smit se kapteinskap.
“Hy sal altyd waarde toevoeg en ’n kalmerende rol op die spelers hê.
”Diegene wat die Springbokke se geploeter vanjaar met die gesukkel van 2006 vergelyk, begaan ’n groot fout.“
Australië is eintlik nou in ’n soortgelyke posisie as waarin Suid-Afrika hom toe bevind het.
Die Wallaby-afrigter (Robbie Deans) is een wedstryd daarvan af om die hele situasie in sy guns te draai,” sê White.
“Hy verstaan hoe om ’n span te bou en die gemiddelde ouderdom van sy spelers is laag.
Daar is ook jong manne soos Will Genia, David Pocock en die Faingaa-broers wat saam die junior Wêreldtoernooi-titel verower het.
“Deans moet boonop spelers soos Dan Vickerman, James Horwill, Ben Alexander, Wycliff Palu, Scott Higginbotham, Stirling Mortlock en Digby Ioane terugkry. Dis soortgelyk aan ons situasie in 2006 toe ons sonder verskeie staatmakers was.”
Bly op hoogte van al die jongste sportnuus deur Nuus24Sport op Twitter te volg
– Sport24