Fourie wil beter skop teen All Blacks
2011-08-19 09:19
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Port Elizabeth – Dit lyk partykeer asof Fourie du Preez hom uit frustrasie aan ’n woedebui gaan oorgee op die rugbyveld.
Hy gooi sy arms dramaties in die lug en smeek omtrent die skeidsregter om ongerymdhede wat hier reg onder sy neus plaasvind, raak te sien.
’n Mens kan dikwels met hom hieroor saamstem, maar is terselfdertyd bang dié Springbok-skrumskakel verloor sy fokus.
“Ek is nie seker waarvan jy praat nie,” het Du Preez Donderdag uit die veld geslaan gesê toe hy oor sy “hulp” aan skeidsregters gepols is.
“Dit is maar die manier waarop ek die afgelope 11 jaar speel.”
Hy het toegegee daar was een of twee voorvalle in verlede week se toets in Durban waar die Wallabies sy geduld by die afbreekpunte beproef het.
Dit was verlede week Du Preez se eerste toets sedert November 2009 nadat hy verlede seisoen met ’n skouerbesering gesukkel het.
Hy het verwag dat hy, nes verskeie ander Bokke wat lank laas in aksie was, aanvanklik ’n bietjie verroes sou wees.
“Ons het ook geweet ons sou dalk teen die einde ’n bietjie sukkel," het hy gesê.
Een van sy sterkpunte was nog altyd sy taktiese skopwerk en hy was nie heeltemal tevrede daarmee verlede week nie.
“Ons skopwerk moet beter wees. Ons weet as dit nie akkurater is nie, kan Nieu-Seeland ons daarvoor laat betaal.”
Nou dat Juan Smith uit die wedloop vir plek in die Springbokgroep vir die Wêreldbekertoernooi is, kan daar aanbeweeg word en ’n geskikte plaasvervanger vir hom gesoek word.
Dit was gister hoe Peter de Villiers, die Bok-breier, probeer het om oor die teleurstelling van Smith se ontrekking ná sy hakseningbesering te kom.
“Juan praat nie baie nie, maar as hy dit die dag doen, luister die ander manne.
Jy sal baie spelers kry wat dieselfde soort spel speel as hy, maar jy sal nie dieselfde vleis om die bene kry wat Smith maak wat hy is nie.”
“Ons sal nou net die regte lostrio-kombinasie moet probeer vind. Ons het gelukkig baie diepte.”
Die All Black-flank Jerome Kaino het Donderdag aan Stephen Nell gesê Smith se onttrekking is ’n groot terugslag vir die Bokke.
“Ek beskou hom as een van die mees onderskatte spelers in die wêreld,” het Kaino gesê.
“Ek slaan hom beslis hoog aan as ’n speler en ’n leier. Ek dink dis vir Suid-Afrikaanse rugby ’n terugslag om hom nie by die Wêreldbeker-toernooi te hê nie.”
Vir die jongste sportnuus volg Nuus24Sport op Twitter.
– Sport24