Duikdokter waarsku Bokke
2011-08-11 10:00
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Umhlanga – Die man wat die Stormers die suinigste span in Super Rugby gemaak het wanneer dit kom by drieë afstaan, is ook nou met die taak opgesaal om die lekkende drieë-kraan by die Springbokke reg te maak.
Die 38-jarige Jacques Nienaber is uiteindelik deel van die Bok-opset, nadat daar in die verlede vergeefs probeer is om dié verdedigingsghoeroe se dienste te bekom.
Hy was reeds verlede maand by die kamp in Rustenburg, waar hy begin werk het aan die Bokke se verdediging.
Dit is die een aspek van hul spel wat oor die laaste paar jaar groot kommer gewek het.
Nienaber sal tot ná die Wêreldbeker-toernooi by die Springbokke betrokke wees.
Dit word allerweë aanvaar dat verdediging die hoeksteen is waarop ’n Wêreldbeker gewen word, en in dié verband maak die Bokke se syfers die afgelope ruk nie goeie leesstof nie.
Hulle het verlede jaar 22 drieë in ses Drienasies-wedstryde afgestaan, en in twee hierdie jaar reeds 11.
Daarenteen het die Stormers, met Nienaber aan die stuur van hul verdediging, vanjaar net 18 drieë in 17 wedstryde afgestaan en verlede jaar is net 17 teen hulle gedruk.
Behalwe dat hy baie aandag gee aan detail op die verdediging soos die regte strukture en verdedigingslyne, glo Nienaber dat verdediging grootliks gaan oor die individuele speler se ingesteldheid.
“Jy moet die hart hê om te wil verdedig en seker te maak jou teenstander kom nie verby jou nie.”
Daarom is hy ook iemand wat groot waarde heg daaraan dat spelers verantwoordelik gehou moet word as hulle met verdediging verbrou.
Nienaber het dit baie duidelik aan die spelers gemaak dat hulle op die Maandag ná ’n wedstryd voor stok gekry sal word as hulle duikslae gemis het.
Hy het dit ook onderstreep dat hulle nie net geroskam gaan word vir foute nie, maar dat daar ook strawwe uitgedeel gaan word en dat spelers selfs hul plekke in die span kan kwyt wees.
Dit plaas die verantwoordelikheid op die speler self om seker te maak hy mis nie ’n duikslag nie. Deur een duikslag te mis, maak jy dit moeiliker vir die res van jou spanmaats, want dan word daar ekstra druk op hulle geplaas om ook jou werk te doen,” het hy gesê.
“Almal in die span moet saamstaan wanneer dit kom by verdediging en daarom moet elkeen se ingesteldheid vir daardie taak reg wees. Jy moet dit wíl doen,” sê hy.
Peter de Villiers, die Bok-afrigter, sê hy is verheug om Nienaber deel van die groep te hê. “Ons spook al ’n lang ruk om hom hier by ons te kry en ek wil die Westelike Provinsie bedank dat hulle hom beskikbaar gestel het as ’n konsultant,” het De Villiers gesê.
Vir die jongste sportnuus volg Nuus24Sport op Twitter.
– Sport24