Doring Danie lek lippe af
2011-08-20 10:13
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Port Elizabeth – Hier is slegte nuus vir senters wêreldwyd – die oud-Springbok Danie Gerber verwag die Nieu-Seelandse frats Sonny Bill Williams kán en nog gáán verbeter.
Gerber, wat op sy dag as een van die beste senters ter wêreld beskou is, kan nie wag nie vir vandag se senterstryd wanneer die Springbokke die All Blacks in hul Drienasies-rugbytoets hier pak.
“Almal praat oor Sonny Bill, maar ons het in Jean de Villiers en Jaque Fourie darem self twee kwaliteit-senters,” het Gerber, ook as die Doring van Despatch bekend, gister gesê.
“Dit kan ’n lekker stryd in die middelveld wees. Ek wil graag sien hoe die Bokke vir Sonny Bill gaan hokslaan.”
Volgens Gerber kan Williams, wat vandeesmaand 26 jaar oud geword het, nog baie ontwikkel. “Ons weet hy is onvoorspelbaar en hy hardloop in die spasie in en dan kry hy die bal weg met daardie 50-50-aangeë van hom.
“Omdat hy relatief jonk is, behoort hy vorentoe nog te verbeter. Hy is so ’n sterk hardloper dat ek dink hy kan nog meer op die aanval doen.”
Dis nie te sê Gerber is nie reeds baie beïndruk met die skade wat Williams op die aanval doen nie. Nee, kyk, hy is ’n man om dop te hou, anders gaan hy jou straf.
“Die groot ding is om hom te verhoed om die bal uit te gee wanneer jy hom probeer stuit.
“Dis nie so maklik nie, omdat hy so sterk is. En as hy dan wel daardie bal wegkry, is daar gewoonlik moeilikheid.”
Gerber het gesê Nieu-Seeland is baie gelukkig om spelers soos Williams, Ma’a Nonu en Conrad Smith te hê wat hulle in die middelveld kan kies.
“Dink vir jouself hoe gaan jy voel as Sonny Bill later in ’n wedstryd teen jou as ’n plaasvervanger opdraf.”
Williams se sentermaat is Richard Kahui en dit sal interessant wees om te sien hoe die twee kombineer.
Hulle kom te staan teen die gesoute senterpaar van De Villiers en Fourie, wat die 24ste keer saam vir die Bokke in die middelveld speel.
– Volg Nuus24Sport op Twitter.