Div voor stok, kies daarna groep
2010-08-06 08:07
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Pretoria - Hopelik het Peter de Villiers vanoggend ’n goeie ontbyt geëet, want daar wag ’n belangrike dag op die Springbok-afrigter.
De Villiers moet om 09:00 aan Sanzar verantwoording doen en verduidelik waarom omstrede uitlatings deur hom nie vertolk moet word as ’n poging om die spel in oneer te bring nie.
De Villiers het onder meer aan die Australiese program op Fox Sports, The Rugby Club, gesê hy glo daar is ’n verband tussen die manier waarop skeidsregters die All Blacks in vanjaar se wedstryde behandel en die feit dat die Wêreldbeker-toernooi in 2011 in Nieu-Seeland gespeel word.
Daarmee is verstaan hy bedoel die All Blacks word doelbewus bevoordeel sodat hulle die toernooi as gunstelinge kan begin.
Hy het later in ’n verklaring verduidelik dat hy bedoel het dit is goed as die All Blacks presteer, want dit sal die belangstelling in die toernooi verhoog en aanwakker.
Hy is nogtans voor Sanzar se regsbeampte in Suid-Afrika, Jannie Lubbe, gedaag en moet verduidelik wat hy eintlik bedoel het.
De Villiers vergader daarna met ’n paar senior Bokke om kajuitraad te hou oor die verloop van die Drienasies-reeks – en oor hoe die Springbokke al drie hul tuistoetse kan wen om hul eer te red.
Sport24 het betroubaar verneem een van die voorstelle gaan wees dat die span sy beplande promosie- en kommersiële aktiwiteite afskaal en op die oefenveld uitkom.
Die Bokke sou aanvanklik op 17 Augustus byeengekom het, maar dit is nou tot Dinsdag vervroeg.
De Villiers sal ná die gesprek met die senior spelers ook met sy keurkomitee vergader om te besluit watter spelers by die groep gevoeg moet word.
Juan Smith, JP Pietersen en Bismarck du Plessis sal na verwagting in die groep wees. Al drie het van beserings herstel wat hulle uit die oorsese deel van die Drienasies gehou het.
Hul ervaring sal goud werd wees vir die Springbokke se aanslag tuis.
Die breier sal ook kopkrap oor sy opsies op senter en skrumskakel. Jaque Fourie is nog geskors en gaan die stryd teen die All Blacks (21 Augustus) misloop, terwyl Ruan Pienaar (skouerbesering), wat skrumskakel teen Australië in Brisbane was, die res van die reeks sal misloop.
Juan de Jongh en Francois Hougaard is die gunstelinge om hul plekke in te neem.
Bly op hoogte van al die jongste sportnuus deur Nuus24Sport op Twitter te volg.
- Sport24