Div verklap WB-geheim oor Vrystaat se Brüssow
2010-08-10 10:00
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Bloemfontein – Heinrich Brüssow draf al voluit, maar is nie beskikbaar om die All Blacks se Richie McCaw of die Wallaby-flank David Pocock in vanjaar se Drienasies-rugbyreeks te probeer tem nie.
Brüssow is Sondag genooi om hom vandeesweek in Johannesburg by ’n vergrote Springbok-groep aan te sluit wat aan ondersteuners hoop gegee het dat hy as baljagter ’n teenvoeter vir McCaw kan wees in 21 Augustus se toets op Soccer City.
“Nee, ek is glad nie beskikbaar vir die Drienasies nie,” sê Brüssow. “Ek begin nou eers weer draf op die veld. Ek is nog ver van speel af, maar voel baie goed,” sê dié Vrystaat-flank wat van ’n knieoperasie herstel.
Die Bok-breier, Peter de Villiers, het deur Brüssow na die oefenkamp te nooi tog een van sy geheime vir 2011 se Wêreldbeker-toernooi in Nieu-Seeland verklap.
Dit is nie verbasend nie, aangesien McCaw en Pocock met hul spel as baljagters tot dusver die grootste invloed op vanjaar se Drienasies-reeks gehad het.
McCaw en Pocock se spel by die afbreekpunte, of dit nou wettig of onwettig is, is van die grootste besprekingspunte in die Drienasies-reeks. Dié tweetal se spel het ook die gebrek aan ’n spesialis-baljagter in die Bok-span beklemtoon.
Brüssow kan dalk in die uitkloprondes van vanjaar se Curriebeker-reeks in aksie wees – as die Vrystaat daarin slaag om tot die halfeindronde deur te dring. Hy is beslis beskikbaar om einde vanjaar saam met die Bokke na Europa te toer – ’n toer wat juis deur De Villiers as ’n kleedrepetisie vir 2011 se Wêreldbeker-toernooi beskou word.
Afgesien van Brüssow, behoort sy Vrystaatse spanmaat Juan Smith ook die Bokke se spel by die afbreekpunte te verbeter.
Smith moes hom ook in Johannesburg aanmeld en die Vrystaat-kamp sal waarskynlik eers vandag verneem of sy kaptein vir Saterdag se Curriebeker-wedstryd teen die Leeus oorweeg kan word.
Die afrigter van die Vrystaat, Naka Drotské, sê die Vrystaat sal die Leeus sonder die Bok-slot Barend Pieterse moet pak.
Pieterse het sy kuit teen die Pumas beseer en kan drie tot vier weke uit wees. Waltie Vermeulen sal hom vir Saterdag se wegwedstryd vervang.
Indien Smith beskikbaar is, kan hy vir Francois Uys langs die kant van die skrum vervang.
Bly op hoogte van al die jongste sportnuus deur Nuus24Sport op Twitter te volg