Div ‘geskok’ oor Bok-slae
2011-08-01 08:14
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Wellington - Noem dit die toer van hel, die toer van die groot ontnugtering of selfs van oordeelsfoute, maar daar is geen rede waarom dié Drienasies-proefneming van die Bok-afrigter, Peter de Villiers, as ’n sukses beskou kan word nie.
Die toer het Saterdagaand hier in die Westpac-stadion op vernederende wyse geëindig toe die Springbokke hul grootste nederlaag tot nog toe op Nieu-Seelandse bodem teen die All Blacks gely het.
Laasgenoemde was met 40-7 baas en die telling kon groter gewees het as Dan Carter beter pale toe geskop het. Die All Black-losskakel het maar twee van sy span se ses drieë verdoel in ’n stryd waarin die tuisspan maklik nóg twee keer kon gaan druk het.
Die waarde van ’n besluit om ’n gros eerstelinie-spelers tuis te los en met ’n klomp nuwelinge die bestes van Australië en Nieu-Seeland te gaan pak, sal eers ná die Wêreldbeker-toernooi in Oktober bepaal word.
Wén die Springbokke dáár, soos in 2007 die geval was toe Jake White ’n soortgelyke waagstuk aangepak het, is alles vergete en sal De Villiers en sy mede-besluitnemers vir hul dapperheid geloof word.
Verloor die Bokke egter, gaan daar ’n gros nuweling-Springbokke wees wat altyd sal hunker na ’n volgende toetsbaadjie en wonder of hul opofferinge die afgelope twee weke nie eerder ’n nagmerrie was nie.
De Villiers het erken hy is geskok. “Ek het nie 40 verwag nie. Die omvang van die nederlaag was ’n skok vir my.
“Daar is vooraf besluit en geoefen dat spelers nie uit die verdedigingslyn moet gaan nie, maar ná drie minute toe gebeur dit al.” Deel van dié rede was ’n besluit deur De Villiers om Morné Steyn as heelagter te kies. Steyn, wat geen natuurlike aanvoeling het vir dié posisie nie, se posisionele spel is deur die All Blacks uitgebuit.
Puntemakers
Nieu-Seeland 40 (18): Drieë: Wyatt Crockett, Zac Guildford (2), Corey Jane (2), Colin Slade. Doelskoppe: Dan Carter (2). Strafdoele: Carter (2).
Suid-Afrika 7 (7): Drie: John Smit. Doelskop: Morné Steyn.
– Vir die jongste sportnuus volg Nuus24Sport op Twitter.
- Die Burger