Div: Niemand kla oor swakker All Blacks
2011-08-16 09:35
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Port Elizabeth – As die Springbokke se afrigters ’n sogenaamde B-span oorsee stuur, word hulle as dom uitgekryt, maar as die Nieu-Seelandse afrigters dit doen, is dit piekfyn.
Só het Peter de Villiers, die afrigter van die Bokke, gister gereageer toe hy oor die verswakte All Black-span wat in die land is, gepols is.
“Dit is nie vir die media ’n groot ding as die Nieu-Seelanders ’n B-span hierheen stuur nie,” het De Villiers effens bitter gesê.
“Maar toe ons soontoe (oorsee) gegaan het (met ’n sogenaamde B-span), wou mense ons doodmaak.
“Daar is aanhoudend beklemtoon hoe dom ons is.
“Tog is dit net ’n kwessie van die Nieu-Seelandse afrigters wat ’n werk het om te doen en ons wat as Suid-Afrikaanse afrigters ’n werk het om te doen.”
De Villiers het al verskeie kere gesê hy het nie ’n ander keuse gehad as om sommige spelers te laat rus nie.
Die All Blacks het dit nou ook gedoen met onder andere die gereelde kaptein Richie McCaw en die briljante losskakel Dan Carter wat vandeesweek uitsit.
“Dit pla my dat dieselfde mense wat ons gekruisig het oor ons span nou stilbly oor die All Blacks se span,” het De Villiers gesê.
“Dit pla my meer as die span wat die All Blacks hier het. Jy kry nie ’n swak All Black-span nie, daar is baie ervare en goeie spelers in die span.”
De Villiers was vriendeliker toe hy oor die ontvangs wat die Bokke in die Baai gekry het en oor die Nelson Mandelabaai-stadion uitgevra is.
Eergister was daar ’n groot klomp ondersteuners by die lughawe om die All Blacks te verwelkom.
Toe die Bokke hier land, was daar self ’n klomp opgewonde ondersteuners om hulle te groet. Daar was ook baie mense wat gister die Bokke se oefening bygewoon het.
“Ons kry altyd so ’n goeie ontvangs by sulke klein plekkies waar mense 10 kilometer van alles af is,” het De Villiers gesê.
Hy was in sy noppies met die Nelson Mandelabaai-stadion en het gesê: “As die fasiliteite 20 jaar gelede hier was, sou ek gesê het Port Elizabeth is daarom gebou.”
Vir die Bokke sal dit Saterdag weliswaar byna soos ’n wegwedstryd wees.
Net twee Bokke, Francois Hougaard en Heinrich Brüssow, het sover vasgestel kon word, al in die stadion gespeel.
Hougaard het in 2009 vir die Southern Kings teen die Britse en Ierse Leeus gespeel en Brüssow het al vir die Cheetahs in ’n vriendskaplike wedstryd teen die OP-Kings uitgedraf.
– Sport24
– Vir die jongste sportnuus volg Nuus24Sport op Twitter.
- Volksblad