Div: 'Bokke is reg vir Aussies'
2011-08-11 20:56
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Durban – Die Springbok-afrigter, Peter de Villiers, het gesê sy span is slaggereed vir Saterdag se Drienasies-wedstryd teen Australië in Durban nadat hy 13 veranderinge aan die span aangebring het.
De Villiers het Donderdag al sy mees senior spelers wat beskikbaar is nader getrek vir ‘n grootskaalse verandering aan die Springbok-span wat twee weke gelede teen Nieu-Seeland uitgedraf het.
Onder die mees opmerklike insluitings tel die terugkeer van die skrumskakel Fourie du Preez en die flank Heinrich Brüssow vir die eerste keer in 21 maande, terwyl die losskakel Butch James ook op verrassende wyse ingesluit is.
Daar was ook plek vir John Smit op haker, terwyl Frans Steyn op heelagter gekies is.
“Dit is fantasties om Fourie en Heinrich terug te hê,” het De Villiers gesê.
“Buiten die feit dat hulle gemaklikheid besorg aan die ouens rondom hulle, is hulle wêreldklas-spelers.
“Hulle bring ‘n element wat ons gemis het oor die afgelope jaar en ek sien uit daarna om hulle so vinnig as moontlik te help om in te val.
“Hulle weet watter verantwoordelikheid op hul skouers rus, die druk op hulle bou op, maar ons weet hulle kan die druk hanteer.”
Du Preez het die internasionale seisoen van 2010 misgeloop weens ‘n skoueroperasie en Brüssow het ‘n ernstige kniebesering gehad.
“Hulle was twee van die voorste spelers in wêreldrugby toe hulle laas in 2009 gespeel het en hulle het baie bygedra tot die Springbokke se sukses daardie seisoen.
“Hierdie is die eerste stap terug vir hulle, maar ons wil hê hulle moet mettertyd dieselfde impak hê.”
Die span wat Saterdag uitdraf sal die mees ervare in Springbok-geskiedenis wees, met altesaam 810 toetse agter hulle, alhoewel die meeste van die spelers oor die afgelope vyf tot sewe weke geen rugby gespeel het nie.
“Die meeste van die ouens het hulself reeds op die verhoog van wêreldrugby bewys,” het De Villiers gesê.
“Hulle sal dalk sukkel vir die eerste 15 tot 20 minute, maar ek glo hul natuurlike talent sal inskop.”
Hy het die land gevra om te vergeet wat in die onlangse toer na Australasië, waar hulle maklik deur die Wallabies geklop is, gebeur het.
“Wat in die verlede gebeur het, was nie goed vir ons land nie en nie goed vir ons nie, maar ons los dit in die verlede. Ons fokus nou net op Saterdag se wedstryd.”
- Volg Nuus24 op Twitter
- SAPA