Dié nr. 9-outjie laat All Blacks wonder
2010-08-16 06:43
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Johannesburg - Wie is hierdie Francois Hougaard-outjie?
Nie dat hulle te paniekerig daaroor lyk nie, maar die All Black-rugbyspan het Sondag erken hulle weet maar weinig van dié jong Blou Bul-skrumskakel wat straks Saterdag die Springbokke se nr. 9-trui in die Drienasies-toets in die FNB-stadion gaan dra.
“Niks,” was die hulpafrigter Wayne Smith se antwoord toe hy gevra is hoeveel hulle van Hougaard af weet.
“Ons het hom op vleuel vir die Bulls sien speel in die Super14-reeks en hy was goed. Hy was duidelik ’n gevaarlike en sterk hardloper, maar ons weet niks oor die res van sy spel, soos sy skopwerk, nie.”
Nadat hy oor Hougaard uitgevra is, is Smith gevra wie hy dink die Springbokke se skrumskakel in die toetswedstryd sal wees. “Wel, nou glo ek dit gaan Hougaard wees,” het hy skertsend gesê nadat die media heelwat vrae oor dié speler gevra het.
Ricky Januarie is die ander skrumskakel in die Bok-groep.
Die All Blacks het self ’n moeilike keuse om te maak in die skrumskakel-posisie.
Jimmy Cowan en Piri Weepu het tot dusver in die Drienasies-reeks om die beurt in die nr. 9-trui gespeel. Volgens Smith is dit ’n moeilike besluit en een waaroor die afrigting-span nog kopkrap.
Cowan het Sondag gesê hy verwag dat Januarie wel in die Bokke se beginspan gaan wees, maar slegs omdat hy (Cowan) Hougaard ook nie juis ken nie. “Ek verwag Ricky sal speel. Ruan (Pienaar) is beseer en ek weet nie eens wie daardie ander skrumskakel is nie,” het Cowan gesê.
In Suid-Afrika is daar geen twyfel oor Hougaard se potensiaal nie, hoewel dit vir hom moeilik sal wees om sy eerste wedstryd in die Springbok-beginspan teen die magtige All Blacks te speel.
Suid-Afrika moet sonder die invloedryke skrumskakel Fourie du Preez klaarkom, maar Smith dink nie dit behoort soveel verskil te maak aan die span se sukses nie.
“Spanne wat erg beïnvloed word deur ’n besering aan een speler van gehalte se fokus is uiteraard verkeerd.”
Die Kiwi-hulpafrigter dink sy span kan veel sterker teenstand van die Bokke verwag as in die onlangse wedstryde in Nieu-Seeland.
“’n Wedstryd teen die Springbokke in Suid-Afrika is steeds een van die grootste uitdagings in rugby. Veral as daar bykomende emosionele sake is soos John Smit se 100ste toets, ’n verwagte skare van 90 000 en dat ons hulle vanjaar twee keer geklop het.”
- Sport24
Bly op hoogte van al die jongste sportnuus deur Nuus24Sport op Twitter te volg