Daar’s tog lewe ná Fourie
2010-09-02 09:06
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Durban - Die Springbokke se probleem in vanjaar se Drienasies-rugbyreeks is nie soseer uitputting of Ierse skeidsregters nie – hulle mis eenvoudig vir Fourie du Preez.
Will Genia, wat in Australië as die “nuwe George Gregan” voorgehou word, het die beseerde Springbok-skrumskakel gister as sy groot held uitgesonder en glo Suid-Afrika het vanjaar sonder hom ’n dimensie ontbreek.
“Fourie beheer eenvoudig die wedstryd en is die spil waarom Suid-Afrika draai. Ek dink Morné Steyn is ’n beter speler wanneer Fourie speel, want hy hoef hom dan oor niks behalwe sy eie spel te bekommer nie omdat Fourie alles beheer,” sê Genia.
“Ek moet sê dat Francois Hougaard nou baie goed vaar en dit lyk of daar lewe ná Fourie is. Hougaard het beslis vir die Springbokke die vonk kom verskaf wat hulle ontbreek het.”
Hougaard het verlede week se eerste ronde in die stryd van die skrumskakels op Loftus Versfeld teen Genia gewen. Die opkomende Bok-ster is as die speler van die wedstryd aangewys in Suid-Afrika se sege van 44-31 oor die Wallabies.
“Sy sterkpunt is dat hy so vinnig oor die veld kom,” sê Genia oor Hougaard. “Hy kom vinnig by die afbreekpunte en laat die ervare ouens aan sy buitekant toe om die die spel te skep. Sy vaart beteken hy kan baie goeie ondersteunende lyne hardloop en dikwels byderhand wees om af te rond.”
Die 22-jarige Genia voel gevlei deur die gereelde vergelykings in Australië met Gregan, maar vir hom is Du Preez eintlik die maatstaf.
“Fourie is die beste skrumskakel wat ek nóg sien speel het. Hy het alles,” sê Genia.
“Hy kan hardloop, skop uitstekend, gee die bal goed uit en het baie goeie visie.
“Wat ek regtig van hom bewonder, is sy merkwaardige vermoë om altyd die regte besluit te neem. Jy sien hom baie selde ’n fout begaan of die verkeerde keuse uitoefen. Hy is beslis een van my helde en iemand teen wie ek graag speel.”
Genia word as ’n toekomstige Wallaby-kaptein beskou en sy vermoë om ’n leiersrol te vertolk, is nog ’n rede waarom die vergelyking met Gregan getref word.
“Gregan het soveel bereik omdat hy oor ’n lang tydperk goed was. Ek begin nou eers met my toetsloopbaan,” sê Genia. “Ek is gelukkig met my vordering, maar wil nou regtig toetse gereeld begin wen. Ons sukkel as groep om sukses te behaal en wil baie graag meer bestendig wees en meer dikwels wen.
“Ons begaan op kritieke tye kritieke foute. Ons probeer soms te veel rugby speel. Die Bokke se balans is baie goed, want hulle skop die bal hoek toe en verplaas die druk na hul teenstanders eerder as om in hul eie helfte te speel.”
Genia wil net aanhou om die basiese dinge goed te doen.
“Die dinge waarop ek my wil roem, is my aangewerk, skoppe en om instinktief te wees. Jy moet altyd vertroue in jouself hê en nooit aarsel nie, want sodra jy dit doen word ’n gulde geleentheid dalk net verbrou.”
Bly op hoogte van al die jongste sportnuus deur Nuus24Sport op Twitter te volg.
- Sport24