Butch wis wat wag teen Wallabies
2011-08-10 08:52
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Umhlanga Rocks - Butch James besef dit sal Saterdag op Kingspark in die Drienasies-rugbytoets teen die Wallabies sy taak wees om die wedstryd vir die Springbokke te beheer.
As James, soos allerweë verwag word, Donderdag as losskakel gekies word, kom hy teen die glibberige Quade Cooper te staan.
“Hy is ’n baie moeilike teenstander en wanneer jy teen ’n onvoorspelbare ou soos hy speel, het jy jou maats nodig om jou uit te help om hom in toom te hou.
“Dit is my taak om die nr. 10-kanaal te verdedig en jy moet maar net hoop jy kies reg watter kant toe hy gaan en dat jy hom kan slag.”
Toe hy gevra is of die Super Cooper hom kan regmaak om ’n bietjie van Butch se medisyne te proe, het James geantwoord: “Ek sal sorg dat ek reg is vir hom, maar as ek hom duik, sal dit binne die reëls geskied.
“Ek glo in elk geval nie daar skort enigiets met my dissipline nie,” het hy gesê, al het hy so pas ’n skorsing van vier wedstryde uitgedien nadat hy in die Lions se laaste Super Rugby-wedstryd teen die Sharks Keegan Daniel met ’n hoogvat geslag het.
“Ons het die laaste ruk baie gepraat oor waar ons nou is ná die nederlae in Australasië. Jy kan soveel praat as wat jy wil in die spankamers, maar dit is jou praatwerk op die veld deur jou aksies wat saak maak.
“Om saam met iemand soos Fourie du Preez te speel, maak jou taak ook soveel makliker, want hy haal die druk van jou af met sy ervaring. Hy weet presies hoe om die spel te beheer.”
Die verantwoordelikheid as stelskopper sal ook op sy skouers rus. “Ja, daar is druk aan verbonde en dit kan daartoe lei dat jou algehele spel nadelig beïnvloed kan word as jy vroeg een of twee skoppe mis.
“Aan die ander kant gee dit jou ook weer meer selfvertroue as jy raak korrel. Soos die jare gevorder het, het my stelskopwerk verbeter en is ek meer akkuraat.
“Dit gaan nodig wees dat ons vanuit die staanspoor druk op hulle moet plaas en hulle oorheers. Die Wallabies is nie ’n span wat jy moet toelaat om sommer gou selfvertroue te kry nie, want dan kan hulle jou seermaak,” het James gesê.
Vir die jongste sportnuus volg Nuus24Sport op Twitter.
– Sport24