Bokke't dalk nuwe heelagter teen All Blacks
2010-08-11 09:21
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Johannesburg - Hoewel daar nog twyfel bestaan oor Frans Steyn se kanse om volgende Saterdag in die Nasionale Stadion (Soccer City) teen die All Blacks uit te draf, kan die Springbokke in elk geval ’n nuwe heelagter in dié Drienasies-rugbywedstryd hê.
Steyn het teen Dinsdagaand nog in Frankryk gewag op die jawoord om na Suid-Afrika te reis, aangesien hy ’n skandering vir ’n enkelbesering ondergaan het.
As Steyn kan speel, sal hy hom so gou moontlik by die Springbok-oefenkamp hier aanmeld.
Maar dié reis en sy lastige enkel kan dit steeds moeilik maak om hom ten koste van Zane Kirchner in die laaste vesting van die beginspan te gooi.
Dié taak gaan heel waarskynlik op die skouers van Gio Aplon val.
Die Springbok-afrigtingspan gaan 5 van die 29 oefengroeplede aan hul unies vir Curriebeker-diens vrystel.
Die unies kan vandag al hoor wie hulle die volgende drie naweke sal kan inspan en dit kan moontlik Kirchner en sy Blou Bul-spanmaats Dewald Potgieter en Wynand Olivier, asook die Westelike Provinsie-flank Francois Louw insluit.
Tendai (Beast) Mtawarira of Jannie du Plessis kan ook na die Haaie terugkeer.
Behalwe vir Aplon in die heelagter-posisie, kan twee Kapenaars dalk ook as ’n nuwe senterpaar teen Nieu-Seeland speel.
Jaque Fourie is geskors en as Olivier vrygestel sou word, kan die middelveld deur WP se Jean de Villiers en Juan de Jongh beman word.
De Villiers is egter ook nog nie by die Bok-oefenkamp nie, aangesien hy Saterdag getrou het en op wittebrood is.
Op skrumskakel kan Francois Hougaard bo Ricky Januarie as Morné Steyn se skakelmaat ingesluit word.
Enkele ander Bokke het sake by gister se fiksheidsessie van die kantlyn af dopgehou.
Du Plessis, BJ Botha, Juan Smith en Ryan Kankowski het nie geoefen nie en die kaptein, John Smit, was grotendeels ’n toeskouer.
Fourie du Preez, Heinrich Brüssow en Bismarck du Plessis was ook teenwoordig. Brüssow en Du Preez gaan egter nog lank weens beserings buite aksie wees, maar word as sleutelspelers vir aanstaande jaar se Wêreldbeker-toernooi steeds betrek.
Du Plessis het pas weer begin speel, maar word nie vir die toets teen die All Blacks oorweeg nie.
Die Bokke sal weer môre, Vrydag en Sondag op die oefenveld wees.
Bly op hoogte van al die jongste sportnuus deur Nuus24Sport op Twitter te volg