Bokke wil alles uithaal vir Mandela-skild
2010-09-04 06:36
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Die Burger
Bloemfontein – Die Drienasies-reeks is lankal verlore, verskeie senior Springbokke het moontlik ’n blaaskans nodig en tog is die nasionale rugbyspan oorgehaal om Saterdag die Mandela-skild te verower.
Die Bokke pak Australië op Vodacompark in hul laaste Drienasies-kragmeting van 2010 en baie Bok-ondersteuners sal wonder of hul span nog enige motivering oor het.
Volgens John Smit, kaptein van die Bokke, is hy en sy spanmaats gereed om vir oulaas alles in die stryd te werp.
Verskeie Bok-staatmakers sal na die wedstryd ’n ruskans kry en eers weer in die uitkloprondes van die Curriebeker-reeks vir hul provinsies speel.
Smit het Vrydag op ’n nuuskonferensie by die Bokke se hotel gesê die Mandela-skild, wat ’n wedywering tussen die Wallabies en Bokke is, is genoeg aansporing om op die veld te draf.
“Die Mandela-skild is beslis iets waarvoor ons kan speel, siende dat ons so ’n swak begin in die Drienasies gehad het. Elke toetswedstryd is spesiaal en om een te hê waar ons boonop vir die Mandela-skild speel, maak dit nog beter.”
Die span se fokus vir die kragmeting is onderstreep toe Smit ’n joernalis se vraag oor duidelikheid rondom die Bees Roux-debakel vroeër die week in die kiem gesmoor het.
“Kom ons fokus eerder op die rugby. Ek weet dit is moeilik vir julle (die media),” het hy gesê.
Peter de Villiers, Bok-breier, het vandeesweek gesê die Bokke ondersteun Roux, wat na bewering ’n metropolisieman doodgeslaan het. De Villiers het gesê hy en sy span het die voorval bespreek en hoewel hulle nie die beweerde daad ondersteun nie, het hulle beslis simpatie met Roux.
Die tuisspan speel Saterdag met die mees ervare Bok-beginspan ooit, met 750 toetse tussen hulle, en sal boonop hoop die geskiedenis herhaal homself om ’n goeie einde aan ’n droewige Drienasies-reeks te maak.
Daar is vandeesweek in die Aussie-kamp juis vanweë die besoekers se vertoningslys op die Hoëveld of in die binneland oor hul voorbereiding gepraat. Die Wallabies het in Durban geoefen en eers Donderdag in die Rosestad aangekom.
Die Aussies kon die Bokke laas in 1963 op die Hoëveld klop toe hulle op Ellispark met 11-9 baas was, maar het sedertdien al hul seges langs die kus behaal.
- Die Burger