Bokke ‘verloor net op telbord’
2011-08-15 10:01
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Durban – Die Springbokke sal beter vertoon in die toets teen die All Blacks in Port Elizabeth as wat Saterdag hier teen Australië die geval was, het Suid-Afrika se afrigter, Peter de Villiers, rugby-ondersteuners verseker.
Volgens De Villiers het van die senior spelers wat lank uit aksie was wedstrydoefening gekry teen die Wallabies en daarom behoort dit reeds teen die All Blacks beter te gaan met sy span.
Hy was in elk geval nie te omgekrap ná die Drienasies-nederlaag van 9-14 teen Australië nie.
“Die telbord is die enigste plek waar ons hierdie wedstryd verloor het.”
Dié woorde van De Villiers sal seker eendag saam met sy lang lys van vreemde stellings in boekvorm verskyn.
Soos almal weet, is die telbord al wat saak maak. Dat De Villiers se stelling daarop neerkom dat die Bokke in alle ander fasette van die wedstryd op Kingspark bo was en eintlik verdien het om te wen, kan ook betwis word.
Ja, kanse het hulle wel gehad, maar as jy nie jou kanse gebruik nie, gaan jy die prys betaal.
Wanneer dit saak gemaak het, was die Wallabies baas en daarom het hulle bo uitgekom op die een plek wat saak maak, die telbord.
De Villiers het darem erken rugby-ondersteuners het die reg om soos Boetman die bliksem in te wees.
Die Bokke het nou vir hulself ’n verloorkultuur geskep waaruit dit nie lyk of hulle weet hoe om te ontsnap nie.
“Ons het wel goeie kanse geskep, maar dit nie benut nie,” het De Villiers erken.
“Daar is genoeg ervare ouens in die span om daardie kanse te kon benut. Toe ons eers agter geraak het, was dit moeilik om in ongunstige toestande in die tweede helfte terug te kom en ’n agterstand uit te wis.”
De Villiers het gesê hy is tevrede met die strukture wat gevestig is en veral die verdediging.
“Dit was ’n groot verbetering op die vorige twee toetse en iets waarop ons kan voortbou.”
Wat die televisieskeidsregter, Shaun Veldsman, se beslissing betref om nie in Jaque Fourie se guns te beslis vir ’n drie in die eerste helfte nie, het De Villiers gesê dit is “maar deel van die spel en dat dit ’n moeilike beslissing was om te vel”.
Vir die jongste sportnuus volg Nuus24Sport op Twitter.
– Sport24