Aplon: Niks fout met ons taktiek
2010-09-03 10:03
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Bloemfontein - Die Springbokke glo in hul strukture en dit laat selfs ’n kreatiewe buksie soos Gio Aplon toe om hom môre hier in die Drienasies-wedstryd teen Australië op die rugbyveld uit te leef.
Aplon is as plaasvervanger in die plek van die beseerde Butch James vir die Bokke se laaste kragmeting van 2010 se reeks gekies en wil graag as hy kans kry die Wallabies dronk hardloop.
Die Bokke is dikwels in die reeks vir hul gebrek aan kreatiwiteit en wedstrydplan gekritiseer, maar die span en sy afrigter, Peter de Villiers, staan daarby. Hulle meen dit moet beter uitgevoer word.
Aplon sê daar skort niks met die Bokke se taktiek nie en dat hy die vryheid het om sy voete en vaart die praatwerk te laat doen.
“Wat goed by die Bokke is daar is ’n struktuur, maar die afrigter gee jou die vryheid om jouself binne daardie struktuur – met die potensiaal en talente wat jou hier gebring het – te kan wees. Daarom is dit ’n mengsel van struktuur en om jouself uit te leef.”
Die blits wil graag op Vodacompark die Aussies besig hou.
“Dis ongelukkig dat Butch seergekry het. Hy het ’n groot impak gemaak en daardie verantwoordelikheid is nou op my skouers om dieselfde impak te maak.
“Dis ’n geleenheid vir my – dis nie ’n reg om vir die Springbokke te speel nie, maar ’n voorreg.”
Die Wallaby-heelagter Kurtley Beale het die wedstryd in Pretoria erken dat die Aussies met opset minder skop en meer wil hardloop.
De Villiers-hulle het verlede jaar, toe hulle die Drienasies-titel gewen het, aansienlik meer as vanjaar geskop.
Volgens Aplon moet hy en sy spanmaats meer akkuraat wees en kan die Wallabies hulle hard straf.
“Die taktiek wat die All Blacks en die Wallabies tot nou toe gebruik het, het vir hulle gewerk.
“Ons moet net meer akkuraat wees in wat ons doen. Ek dink hulle het weer bewys dat as jy net 1% af is in wat jy wil doen, kan hulle jou bietjie seermaak. Daarom moet ons net daardie 1%, waar ons miskien op 99% was, optel en 100% insit. Dis moeilik om te sê wat gaan werk en wat nie. Ons moet maar net doen wat ons doen – dit het verlede Saterdag gewerk,” sê Aplon.
Bly op hoogte van al die jongste sportnuus deur Nuus24Sport op Twitter te volg.
- Sport24