Zondi neem Dusi-voortou

2013-02-14 11:57

Kaapstad – Sbonelo Zondi het Donderdag vir 'n groot verrassing gesorg toe hy die gunsteling, Andy Birkett, in die eerste skof van die Dusi-kanomarathon buite Pietermaritzburg geklop het.

Die 24-jarige Zondi het die skof oor 42 km tussen Kampsdrift en die Dusi-brug in 'n rekordtyd van 2:43:17 gewen, sowat 39 sekondes vinniger as die vorige beste tyd en 20 sekondes voor die driemalige kampioen Birkett.

In die vroue-afdeling het Robyn Kime, wat net soos Birkett haar visier stel op 'n vierde Dusi-titel, die eerste skof in 'n rekordtyd van 3:11:21 gewen.

Kime se tyd was byna 15 minute vinniger as die van Abby Adie, wat tweede in 'n 3:25.15 klaargemaak het.

Die Dusi-kanomarathon eindig Saterdag by die Blue Lagoon in Durban.

Vir die jongste sportnuus volg Nuus24Sport op Twitter.

– Sport24

- SAPA