Wozniacki kook in VSA
2011-09-07 08:59
New York. – Die wêreld se voorste vrouespeler, Caroline Wozniacki, het die juk van die verwagtinge wat haar status op haar skouers plaas, afgeskud ná ’n skitterende terugvegpoging in die vierde ronde van die Amerikaanse Ope-tennistoernooi.
Dié 21-jarige Deen, wat ondanks die afwesigheid van ’n Grand Slam-titel reeds 46 weke lank eerste op die wêreldranglys is, het Dinsdag ’n agterstand van 6-7 en 1-4 in die tweede stel, omskep in ’n sege oor Svetlana Kuznetsova van Rusland.
Wozniacki het 2004 se kampioen met 6-7 (6/8), 7-5, 6-1 verslaan. Sy het drie uur en twee minute nodig gehad om haar Russiese teenstander onder te kry.
Die Deen het ’n voorsprong van 5/2 in die valbylpot van die eerste stel laat glip en haar selfvertroue sodanig verloor dat sy kort voor lank 1-4 agter was in die tweede stel.
Maar daarna het Kuznetsova se spel aan skerwe gespat. Sy het 78 ongedwonge foute begaan en stelselmatig moeër geraak. Sy het ook toegelaat dat Wozniacki die tempo en trant van die stryd bepaal.
“Ek het teruggedink aan die wedstryd wat ons in 2009 hier teen mekaar gespeel het,” het Wozniacki volgens Sapa-AFP gesê.
“Toe was ek ook ’n stel en ’n bietjie agter, maar het steeds gewen.”
As die Deen vandag in die kwarteindronde met die Duitser Andrea Petkovic afreken, sal sy waarskynlik in die halfeindronde teen Serena Williams te staan kom. Williams het tot die laaste agt deurgedring deur die Serwiër Ana Ivanovic met 6-3, 6-4 te klop.
)Die voorste mansspeler, Novak Djokovic, het in skoon stelle tot die kwarteindronde deurgedring nadat hy ’n marathon-valbylpot in die eerste stel van sy wedstryd teen Alexandr Dolgopolov gewen het.
Djokovic en Dolgopolov het alles gegee in ’n valbylpot wat 30 punte ingesluit het en Djokovic met 16-14 gewen het.
Daarna het die Serwiër die volgende stelle met 6-4, 6-2 gewen.
Roger Federer was nie lank op die baan nie vir sy sege van 6-1, 6-2, 6-0 oor Juan Monaco van Argentinië.
Die flambojante Fransman Jo-Wilfried Tsonga en nog ’n Serwiër Janko Tipsarevic is ook deur.
Vir die jongste sportnuus volg Nuus24Sport op Twitter.
– Sport24