Woods se lys van skelmpies groei
2009-12-21 08:57
Hollywood - Die popsangeres en aktrise Jessica Simpson is die nuutste vrou wat van ’n verhouding met die gholfspeler Tiger Woods verdink word.
Dit bring die lys van Woods se beweerde skelmpies op sowat 12 te staan.
Die Daily Star, ’n Britse poniekoerant, beweer Woods (33) is in Julie verlede jaar hand om die lyf afgeneem by ’n gholftoernooi in die VSA waar die 29-jarige Simpson die volkslied gesing het.
Agt dae later is haar verhouding van 18 maande met die Amerikaanse voetbalster Tony Romo beëindig.
Volgens ’n berig in die VSA het “Tiger gehou van wat hy gesien het” en Simpson dit deeglik laat verstaan.
Die sangeres het woedend op die sosiale netwerk Twitter gereageer: “Wat ’n GRAP! Die ‘skokkende onthullings’ is (wag daarvoor) ’n LEUEN!” het sy geskryf.
Intussen weier Woods glo om opgeneem te word in ’n rehabilitasiesentrum waar hy van sy “seksverslawing” genees kan word – aldus die Daily Star.
Daarom meen sy vrou, Elin Nordegren (29), glo daar is nie meer hoop om hul huwelik van vyf jaar te red nie.
“Elin het geweet die huwelik is op die rotse toe Tiger geweier het om hulp te kry vir sy probleem,” het ’n vriendin beweer.
Todd Phillips, die regisseur van die trefferkomedie The Hangover, wil Woods betrek by ’n opvolgfliek – glo om hom te help om sy openbare beeld te herstel.
Die omstrede bokser Mike Tyson het ’n soortgelyke gasterol in die eerste fliek gehad.
- Beeld