Woods onbewus van spot-boodskappe
2010-04-09 11:17
Augusta – Tiger Woods het gesê dat hy nooit die spottende boodskappe agter aan vliegtuie opgemerk het toe hulle Donderdag oor die Augusta Nasionale gholfklub gevlieg het nie.
Woods neem vir die eerste keer in vyf maande weer deel ná ‘n seksskandaal waarin hy in verskeie buite-egtelike verhoudings betrokke was.
Woods was op die setperk by die eerste putjie toe ‘n vliegtuig oor die bekende baan gevlieg het met ‘n boodskap wat lees: “Tiger, het jy bedoel ‘booty-ism’?”
Die speel met woorde het verwys na Woods wat gesê het dat hy gaan terugkeer na sy Boeddhistiese wortels om te probeer om innerlike vrede en balans te verkry wat hy glo verloor het gedurende sy tyd van rondkafoefel.
“Booty” is ‘n term wat gebruik word in verband met seks en seksuele aantrekking.
Later in die dag het nog ‘n vliegtuig oor die baan gevlieg met die boodskap: “Seksverslaafde? Ja reg, seker. Ek ook!”
Terwyl Woods nie gesê het dat hy ‘n seksverslaafde is nie, het hy 45 dae in ‘n fasiliteit deurgebring vir ‘n probleem wat die media uitgemaak het as seksverslawing.
Woods het gesê dat hy nie die boodskappe raakgesien het nie, maar hy was glad nie beïndruk met die feit dat iemand geld sou spandeer om met hom te spot nie.
“Dit sal nie die eerste keer wees nie,” het hy gesê.
Wanneer dit by Boeddhisme kom, die geloof wat hy van sy ma Kultida geleer het, het Woods gesê dat dit ‘n verskil vir hom maak en dat hy sal voortgaan om dit te beoefen terwyl hy probeer om sy lewe te verander.
- AFP