'Woods is binnekort terug'
2010-01-15 18:06
Parys – Roger Federer het gesê dat hy telefonies met sy vriend Tiger Woods gepraat het en dat die gholf-legende binnekort sal terugkeer as die “wonderlike gholfspeler wat ons ken”.
Volgens Federer was Woods se motorongeluk in November en die gevolglike berigte oor sy privaatlewe baie moeilik vir Woods en sy familie.
Federer het aan die sport dagblad L’Equipe sy ondersteuning uitgespreek en gesê dat Woods se moeilikheid “leersaam” was.
“Die koerante gaan mal. Borg-kontrakte val deur die mat...ek was nog altyd bewus daarvan dat die beeld wat jy geduldig vir ‘n hele loopbaan opbou, in ‘n minuut vernietig kan word,” is Federer aangehaal.
“Dit maak jou effens bang, maar dit is hoe dinge werk.”
Woods is nog glad nie sedert die ongeluk in die openbaar gesien nie en ander vriende het gesê dat hulle onsuksesvol was in pogings om hom in die hande te kry.
“Tiger het kalmte nodig. En hy sal binnekort weer die wonderlike gholfspeler wees wat ons ken,” het Federer gesê.
- AP