Woods en Rose saam op St. Andrews-baan
2010-07-13 08:18
St. Andrews – Tiger Woods speel Donderdag en Vrydag die eerste twee rondes van die Britse Ope hier in Skotland saam met een van die “warmste” gholfspelers ter wêreld, die Engelsman Justin Rose.
Rose het twee van sy laaste drie toernooie in die Amerikaanse PGA-reeks gewen.
Dit is die eerste keer sedert die Ope in Muirfield in 2002 dat hulle saam speel. Agt jaar gelede was die omstandighede baie anders.
Rose het toe net sy eerste toernooi as beroepspeler gewen, terwyl Woods die derde toernooi van die Grand Slam in een kalenderjaar in sy visier gehad het.
Die voorste gholfspeler ter wêreld het nog nie vanjaar ’n toernooi gewen nie nadat hy ná ’n afwesigheid van vyf maande om die chaos in sy persoonlike lewe uit te stryk, teruggekeer het.
Rose het die Memorial-toernooi in Amerika gewen, daarna voorgeloop ná 54 putjies in sy volgende toernooi en twee weke gelede die AT&T-toernooi buite Philadelphia gewen.
Die Colombiaan Camilo Villegas is die ander speler in hul driebal. Die 29-jarige Rose is nie die enigste speler wat uitstekend op dreef is nie.
Die kampioen in die Amerikaanse Ope van 2010, Graeme McDowell, het ook onlangs twee toernooie gewen en hy bevind hom op die eerste twee dae in die geselskap van twee ander Amerikaanse Ope-kampioene, Geoff Ogilvy en Jim Furyk.
Die Meesterskampioen, Phil Mickelson, speel saam met die Europese Ryderbeker-kaptein, Colin Montgomerie, wat vyf jaar gelede die naaswenner was toe Woods die Britse Ope gewen het.
Suid-Afrika se Retief Goosen is ook in hul groep.
Ernie Els, Suid-Afrika se voorste speler, speel saam met die verdedigende kampioen, Stewart Cink, en die Engelsman Ian Poulter.
Nog ’n Engelsman, Lee Westwood, nr. 3 ter wêreld en die voorste Europese speler in die toernooi, stap saam met die Spanjaard Miguel Angel Jiménez en die Australiër Adam Scott.
Die Amerikaner Tom Watson (60) het Ryo Ishikawa (18) van Japan as speelmaat.
Bly op hoogte van al die jongste sportnuus deur Nuus24Sport op Twitter te volg.
- Sport24