Weddenskappe op Tiger se egskeiding
2009-12-19 01:43
Londen - As Tiger Woods en sy Sweedse vrou, Elin Nordegren, skei, gaan sy nie die enigste een wees wat met 'n aardige bedraggie wegstap nie.
Die Britse beroepswedder William Hill neem weddenskappe oor hoeveel Nordegren gaan kry as sy besluit om van die ster-gholfspeler te skei.
Woods het aangekondig dat hy vir 'n onbepaalde tyd 'n breek van die sport neem om aan sy huwelik te werk ná hy erken het dat hy sy vrou verkul het.
Die wedsyfer is 25-1 dat Nordegren meer as 'n half miljard dollar uit dié egskeiding gaan kry.
Die wedsyfer daal na 6-4 vir 'n bedrag minder as $100 miljoen (sowat R754 miljoen).
Hill bied 'n 1-2 wedkans aan dat sy tussen $100 miljoen en $500 miljoen (sowat 3,7 miljard) gaan kry.
Nordegren (29) is van plan om van Tiger Woods te skei, berig die skindertydskrif People.
Dít kom nadat sy in die openbaar sonder haar troupant gesien is en nadat ’n meubelwa by hul huis in Florida gewaar is.
Die tydskrif het gister ’n vertroueling van Nordegren as bron aangehaal in ’n berig dat sy van plan is om van die superster-gholfspeler te skei. Woods het na bewering verhoudings met tot 14 ander vroue gehad.
Die bron het glo gesê Nordegren, ’n gewese kinderoppasser en model, het “haar besluit geneem”.
"Daar is niks om oor te dink nie. Hy sal nooit verander nie."
Die webwerf wat berig oor beroemdes, RadarOnline, beweer Nordegren het selfs die dienste bekom van die prokureur wat die egskeidingsgedinge van sterre soos Nicole Kidman, Nicolas Cage en Britney Spears behartig het.
Die paartjie se huweliksprobleme het aan die lig gekom nadat Woods laat die nag van 27 November met sy motor in ’n boom buite hul huis in Florida vasgejaag het. Die ongeluk het glo gevolg op ’n rusie oor sy ontrouheid.
– Sapa-AP