Vroue kos Tiger glo miljoene
2009-12-06 11:05
Karin Burger
Johannesburg - Tiger Woods steek blykbaar nou sy hand diep in die sak om die vroue in sy lewe gelukkig – én stil – te hou.
Die miljardêr-gholfspeler het na bewering $5 miljoen (R37 miljoen) in sy vrou, Elin Nordegren, se persoonlike bankrekening inbetaal om te keer dat sy hom los. Hy het nóg ’n sessyfer-bedrag opgedok om te keer dat een van sy minnaresse enigiets uitlap oor hul affair van ses maande.
Woods pas nou verwoed skadebeheer toe ná ’n motorongeluk verlede Vrydag in die vroeë oggendure buite sy luukse Florida-huis.
Sedertdien het ’n rits buite-egtelike verhoudings aan die lig gekom. Sommige kan na April 2007 teruggevoer word.
Rachel Uchitel (34), ’n New Yorkse nagklub-gasvrou, het met Woods gesels skaars ure voordat sy openlik oor hul verhouding sou gepraat het.
Sy het toe die mediakonferensie gekanselleer waartydens haar prokureur die media oor haar “verhouding” met die gholfster sou toespreek.
Uchitel se prokureur wou nie bewerings bevestig dat haar stilte vir minstens $1 miljoen (R7,4 miljoen) gekoop is nie.
Uchitel se verloofde is in die 9/11-terreuraanval dood.
Woods (33) word ook nou verbind met die kelnerin Jaimee Grubbs (24) en die Las Vegas-klubbestuurder Kalika Moquin (27).
Grubbs sê sy en die sportster het ’n affair van 31 maande gehad, terwyl Moquin beweer sy het nog so onlangs as Oktober saam met Woods in ’n hotel in Las Vegas geslaap.
Hy het intussen op sy webwerf ’n brief geplaas waarin hy aan familie en vriende “persoonlike sondes” erken. Hy sê ook hy het sy 29-jarige vrou en hul twee kinders in die steek gelaat.
Daarna het die egpaar “intense” huweliksberading ontvang.
Berigte in die Amerikaanse media beweer dat die huwelikskontrak wat Woods en sy vrou vyf jaar gelede geteken het, nou hersien word sodat sy ’n groter deel kry indien hulle sou skei.
As die paartjie in die skeihof beland, kry sy tussen $55 miljoen (R409 miljoen) en $75 miljoen (R558 miljoen) – dit is báie meer as die $20 miljoen (R149 miljoen) van die oorspronklike kontrak.
Daar is darem ’n bietjie goeie nuus vir Woods… Die Florida-verkeerspolisie het hul ondersoek na die ongeluk voltooi en geen strafregtelike klagte gaan teen hom ingedien word nie.
Die verkeersoortreding kos hom net ’n boete van sowat R2 000 vir roekelose bestuur, met vier punte teen sy rybewys.
Bronne: Dailymail.co.uk; Iol.co.za; Mirror.co.uk.
- Rapport