Vreugde, trane ná Cape Pioneer in S-Kaap
2010-10-25 09:00
Oudtshoorn - Die emosies het hoog geloop en die trane het vryelik gevloei toe die DCM Cape Pioneer Trek-bergfietstoer Saterdag hier tot ’n einde gekom het.
Dié sesdaagse fietstoer het ná 680 km op ’n hoogtepunt vir die sowat 200 oorblywende deelnemers geëindig. Ongeveer 300 het Maandag weggespring.
Tussen die beroepsjaers het Suid-Afrika se Max Knox en sy Switserse spanmaat, Thomas Zahnd (DCM), algeheel in 28 uur, 8 minute en 25 sekondes geseëvier.
Kevin Evans en Adrien Niyonshuti (MTN-Energade), wat die laaste skof gewen het, was algeheel tweede (28:26:04). Die Switserse kombinasie van Christoph Sauser en Silvio Bundi (Songo.info) het die laaste plek (29:58:49) op die wennerspodium geneem.
Dit was Bundi se laaste wedren as ’n beroepsbergfietsryer en dié 32-jarige Switser se loopbaan het op emosionele wyse geëindig.
Sauser en Bundi wou baie graag die laaste skof wen, maar geen gunste is bewys nie.
Volgens Bundi het alles eindelik van homself afgehang nadat Sauser en Niyonshuti weggebreek het en hy toe net Evans vir ’n skofsege moes klop.
“Ek was agter Kevin in die laaste draai, maar het net nie die krag in my bene gehad om verby te gaan nie. Dit is egter ’n wonderlike einde tot my loopbaan. Ek het myself baie geniet,” het Bundi gesê.
Vir Zahnd was dit die eerste toersege van sy loopbaan.
Hy geniet dit baie om aan byeenkomste soos dié deel te neem, maar was nog nie op die boonste trappie van die wennerspodium voor nou nie.
“Ek het al oor die wêreld heen deelgeneem aan meerdaagse bergfietstoere, maar nog nooit gewen nie.
“Ek is so dankbaar vir dié sege en vir Max wat ’n wonderlike spanmaat was,” het die 29-jarige Zahnd gesê.
Die wenners van die afdeling vir gemengde pare, Switserland se Patrick Griessen en Ariane Lüthi, was oorweldig by die eindpunt.
Lüthi het nie woorde gehad nie en die trane het gevloei, terwyl Griessen woorde probeer vind het. “Ek het hierheen gekom en nie geweet wat om te verwag nie en kyk nou... ek het gewen!” het Griessen gesê.
Bly op hoogte van al die jongste sportnuus deur Nuus24Sport op Twitter te volg.
- Sport24