Vrae oor Caster se taktiek in VSA
2011-06-06 07:37
Pretoria - Speel Caster Semenya, wêreldkampioen in die 800 m, steeds speletjies op die atletiekbaan, of weet sy nie hoe om takties ’n goeie wedloop te hardloop nie?
Dít is vrae wat onwillekeurig opkom ná die Suid-Afrikaner se vertoning op die Diamantliga-byeenkoms in Eugene, VSA.
Kenia Sinclair van Jamaika het Saterdag in ’n tyd van 1:58.29 gewen. Semenya was tweede in 1:58.88 en Janeth Jepkosgei van Kenia derde in 1:59.15.
Die goeie nuus is dat Semenya seker gemaak het sy kwalifiseer vir die Wêreldbyeenkoms in Augustus in Daegu, Suid-Korea.
Dis die eerste keer dié seisoen dat sy die 800 in vinniger as 2 minute afnael. Semenya was ná die eerste 400 m tweede laaste, amper 10 m agter die voorlopers.
Dit wou voorkom asof sy glad nie ’n rolspeler in die wedloop sou wees nie, maar toe sy oor die laaste 250 m met haar befaamde eindpoging begin, was daar geen keer aan haar nie.
Sy het almal behalwe Sinclair ingehaal en verbygesteek. Met dié vertoning het Semenya bewys daar is min atlete wat saam met haar kan hardloop wanneer sy eers op volspoed is.
Daarom kan net gewonder word wat sal gebeur as sy ná die eerste 400 m saam met die voorlopers is en nie van agter af met ’n terugvegpoging moet kom nie.
Semenya is min gepla oor die kritiek rondom haar wedloop-taktiek. “Ek is tevrede met hoe my wedloop verloop het. My tyd is goed. Dit is vinniger as twee minute en dit is al wat ek in die wedloop wou vermag. Ek weet as ek harder oefen, sal ek ’n nog vinniger tyd kan hardloop,” het sy in ’n onderhoud op die Diamantliga se webwerf gesê.
Semenya is Donderdag in Oslo, Noorweë, weer in die Diamantliga in aksie.
Haar landgenoot Khotso Mokoena (8.31 m) is in die verspring net-net geklop. Greg Rutherford van Brittanje (8.32 m) het gewen.
Die hartseer vir Mokoena is dat hy steeds nie vir die Wêreldbyeenkoms gekwalifiseer het nie. Die wind van agter was weer te sterk.
Ruben Ramolefi was vierde (8:24.95) in die 3 000-hindernis; Oscar Pistorius laaste in die 400 m (46.33 s) en Sunette Viljoen vyfde in die spiesgooi (60.09 m).
Mbulaeni Mulaudzi, wêreldkampioen in die 800 m, het in Pole teleurgestel toe hy vyfde in 1:46.59 geëindig het.
Vir die jongste sportnuus volg Nuus24Sport op Twitter.
- Sport24