Voormalige atletiek-kampioen sterf in ongeluk
2011-12-23 10:45
Johannesburg – Die voormalige padwedloop-kampioen Zithulele Sinqe is Donderdag in ‘n motorongeluk dood.
Mandla Radebe, algemene bestuurder van Sentraal-Gauteng Atletiek (SGA), het Vrydag gesê Sinqe (48) was betrokke in ‘n motorongeluk in Balfour, waar hy gewerk het nadat hy ‘n ontwikkelingsklub vir atletiek in die gebied gestig het.
“Sinqe was ‘n lid van die SGA-kommissie, so hierdie is ‘n groot verlies vir die provinsie en atletiek,” het Radebe gesê.
Sinqe, wat ‘n afrigter en televisiekommentator was oor die afgelope paar jaar, sal onthou word vir sy titaniese stryde met Willie Mtolo, Matthews Temane en Xolile Yawa tydens Suid-Afrika se goue era van padwedloop, kort voor die land se terugkeer na die internasionale sportwêreld ná isolasie.
Hy het in 1986 die SA marathon-kampioen geword met wat toe die vyfde beste tyd ooit was – 2:08.04 – in Port Elizabeth.
Die volgende jaar is hy net-net deur Temane geklop in die wedloop vir die SA halfmarathon-titel. Albei wedlopers het ‘n tyd van 1:01.11 behaal – ‘n wêreldrekord vir dié afstand wat 10 jaar lank gestaan het.
Later in sy loopbaan het Sinqe op ultramarathon-wedlope gefokus. Hy het die 56 km Two Oceans-marathon in 1996 en 1997 gewen.
- Volg Nuus24Sport op Twitter
- SAPA