Voormalige F1-jaer kry tronkstraf vir vriend se dood
2011-12-14 20:11
Helsinki – 'n Hof in Finland het die voormalige Formule Een-jaer Jyrki Jarvilehto Woensdag tot 30 maande tronkstraf gevonnis vir 'n bootongeluk wat sy vriend se dood veroorsaak het.
Die hof het Jarvilehto, bekend as JJ Lehto op die renbaan, skuldig bevind dat hy die dood van sy vriend veroorsaak het toe die snelboot waarin hy gejaag het terwyl hy dronk was, teen 'n brug gebots het.
Jarvilehto is ook skuldig bevind aan dronkbestuur. Die hof het gesê die boot het teen 'n snelheid van 80 km/h gejaag in 'n kanaal waar die spoedbeperking 5 km/h was.
Jarvilehto se prokureur, Juhani Ripatti, het gesê hulle sal teen die vonnisoplegging appelleer.
Die 45-jarige voormalige renjaer is in die ongeluk beseer. Hy het aan die hof vertel dat hy byna verdrink het en niks van die ongeluk kan onthou nie omdat hy reeds dae aaneen gedrink het.
Maar Jarvilehto het ontken dat hy die boot bestuur het alhoewel 'n ondersoekspan gesê het sy beserings dui aan dat hy in die bestuurstoel gesit het.
Jarvilehto was 'n Formule Een-jaer vanaf 1989 tot 1999. Hy het die Le Mans 24-uur wedren in 1995 en 2005 gewen.
Volg Nuus24Sport op Twitter.
- SAPA