Vier Olimpiese atlete hul medaljes kwyt

2012-12-06 08:27

Lausanne – Vier medaljewenners van die Olimpiese Spele in 2004 in Athene is van Woensdag af amptelik hulle medaljes kwyt ná die Internasionale Olimpiese Komitee (IOK) teen hulle aksie geneem het.

Die IOK het die besluit geneem ná nuwe ontleding van opkikkertoetse wat by die Spele in Athene geneem is, getoon het dat hulle verbode middels gebruik het.

Die Oekraïne se Yuri Belonog het sy goue medalje vir die gewigstoot verloor, terwyl Belarus se Ivan Tikhon sy silwer medalje in die hamergooi kwyt is.

Irina Yatchenko van Belarus en Rusland se Svetlana Krivelyova het hulle brons medaljes in onderskeidelik die diskus- en gewigstootitems verloor.

Dis die tweede keer wat Tikhon 'n Olimpiese medalje verloor. Die brons medalje wat hy in die Spele van 2008 gewen het, is ook weens die gebruik van verbode middels van hom afgeneem.

– Vir die jongste sportnuus volg Nuus24Sport op Twitter.

- Sapa - AFP