Vettel se wêreldtitel in gedrang

2012-11-29 16:10

Maranello, Italië – Ferrari oorweeg 'n appèl wat die Red Bull-renjaer Sebastian Vettel se Formule Een-wêreldtitel in gedrang plaas.

'n Video van Sondag se Brasiliaanse Grand Prix wys dat Vettel 'n Toro Rosso-motor verbygesteek het, terwyl 'n geel waarskuwingslig aan was. Indien daar bewys kan word dat Vettel die reëls oortreë het, kan hy met 20 sekondes gepenaliseer word.

Dít sal dan beteken dat Vettel van die sesde na die agtste plek skuif en die Ferrari-renjaer Fernando Alonso die F1-titel met een punt wen.

"Ons kyk na die video. Ons het tot môre om 'n appèl in te dien," het Luca Colajanni, woordvoerder van Ferrari, gesê.

Een van die videos is geneem van 'n kamera wat op Vettel se Red Bull-motor was.

Alonso het tweede in die wedren geëindig, maar Vettel het die titel met drie punte gewen.
      
– Volg Nuus24Sport op Twitter

- Sapa - AP