Vertragings in Semenya-saak ASA se skuld
2010-04-05 14:46
Johannesburg – Die saak rondom Caster Semenya se geslag duur reeds langer voort as enige ander soortgelyke geval wat deur die Internasionale Vereniging van Atletiekfederasies (IAAF) hanteer is, het 'n senior beampte wat by soortgelyke sake betrokke was, gesê.
Die IAAF het al in die verlede agt atlete se geslagstoetse hanteer, maar die moeilikste van hierdie sake is in slegs ses maande afgehandel.
Semenya is in Augustus verlede jaar vir die eerste keer getoets, en agt maande later het die IAAF steeds nie besluit of sy teen vroue in atletiek mag meeding nie.
"Wanneer 'n atleet se geslag bevraagteken word, moet daar eers toetse gedoen word,” het die beampte gesê, wat graag anoniem wou bly.
“Die atleet besluit op 'n mediese span en hulle werk dan saam met 'n mediese span van die IAAF. Dan word 'n ooreenkoms bereik na aanleiding van die uitslae van die toetse.
“Hierdie proses het nog nooit van begin tot einde langer as ses maande geneem nie. En dit was die langste saak.
“As gevolg van die swak manier waarop hierdie saak egter deur Atletiek Suid-Afrika hanteer is, en omdat regspanne by die saak betrek is, is die begin van die proses vertraag. Ek is seker die twee mediese spanne het nie voor Januarie byeengekom nie, en dís hoekom die saak so lank neem om op te los.
“Ek dink nie die IAAF vertraag die proses opsetlik nie, dis net dat daar meer komplikasies ter sprake is as by ander gevalle.”
Semenya het verlede week glo gedreig om regstappe te neem as sy nie toegelaat word om Dinsdag aan die laaste byeenkoms van die Yellow Pages-reeks in Germiston deel te neem nie.
- SAPA