Vergrote hart dalk rede vir fietsryer se dood
2010-03-30 08:45
Marelize Potgieter
Kaapstad - Gerugte dat die voormalige Australiese wêreldkampioen-bergfietsryer James Williamson weens ’n vergrote hart gesterf het, kon nie gister bevestig word nie.
Williamson se vriendin, Niki Fisher, het luidens die webtuiste www.cyclingnews.com gesê ’n ongediagnoseerde harttoestand was die oorsaak van sy dood.
Volgens haar het ’n lykskouing getoon dat sy een hartkamer nie die bloed genoegsaam uitgepomp het nie en dat sy hart vergroot het om daarvoor te kompenseer.
“Dit was ’n genetiese toestand en fietsry het niks met sy dood te doen gehad nie.”
Die 26-jarige redakteur van die bergfietstydskrif Enduro het ten tyde van sy dood aan die Absa Cape Epic-bergfietstoer deelgeneem. Hy en sy Australiese spanmaat, Shaun Lewis (28), het ná verlede Maandag se tweede skof die 18de plek beklee. Dinsdag om 05:10 kon Lewis nie vir Williamson voor die derde skof wakker kry nie.
’n Lykskouing is verlede week gedoen. Volgens die webblad het die ondersoek getoon dat daar geen blokkasies in sy are was nie en dat sy kaliumvlakke normaal was.
Kevin Vermaak, stigter en direkteur van die Cape Epic, het gerugte dat Williamson aan ’n vergrote hart oorlede is nie ontken of bevestig nie.
“Die keuse berus by die familie of hulle inligting oor die lykskouing bekend wil maak.”
Die dokter van die fietstoer, dr. Basil Bonner, het gesê daar is nog inligting oor die lykskouing wat nagegaan moet word voordat daar presies gesê kan word waaraan hy oorlede is. Die volle anatomie van sy hart en liggaam moet in ag geneem word voordat enige uitsprake gemaak kan word.
- Sport24