Van der Merwe klim ATP-rangleer
2011-11-07 14:10
Johannesburg – Suid-Afrika se tweede gekeurde tennisspeler, Izak van der Merwe, het 17 plekke op die ATP-ranglys geklim na hy die naweek sy eerste titel in Amerika gewen het.
Van der Merwe het tot die 115de posisie van die ATP-ranglys, wat Maandag bekendgestel is, geskuif.
Maar dit is steeds twee plekke laer as die posisie wat hy in Augustus beklee het.
Die 27-jarige, wat die Soweto Ope in April vanjaar gewen het, moes Sondag hard veg om die Amerikaner Jesse Levine met 4-6, 6-3 en 6-4 in Charlottesville te klop.
"Dit voel ongelooflik om my eerste titel in Amerika te wen," het die Suid-Afrikaner gesê.
Van der Merwe het gesê hy sal nog in twee toernooie in Amerika (Tennessee en Illinois) speel voor hy na sy tuisdorp Stellenbosch terugkeer.
Vir die jongste sportnuus volg Nuus24Sport op Twitter.
– Sport24