Tyler doen dit vir Yanks en Wouter
2011-07-05 07:33
Pretoria – Tyler Farrar (Garmin-Cervelo) het in Maandag se derde fietsryskof van die Tour de France iets reggekry wat nóg Lance Armstrong (sewemalige wenner) nóg Greg le Mond (’n driemalige wenner) kon vermag.
Dít is om ’n skof op Amerika se Onafhanklikheidsdag te wen.
Die Amerikaner het Romain Feillu (Vacansoleil-DCM) in die naelrit na die eindstreep geklop. Jose Rojas (Movistar) was derde.
Die wentyd vir die skof oor 191 km was 4 uur 40 minute en 21 sekondes.
Die uitslag het geen invloed op die algehele stand van sake nie.
Thor Hushovd (Garmin-Cervelo) is steeds die algehele voorloper met dieselfde tyd as sy spanmaat David Millar en ’n sekonde voor Cadel Evans (BMC).
Farrar het hom met sy skofsege aangesluit by ’n klein groepie jaers wat al skofte in al drie die grootste toere – Tour de France, Giro d’Italia en Vuelta Espana – gewen het.
Hy het met sy sege ook hulde gebring aan sy beste vriend, Wouter Weylandt, wat vroeër vanjaar gedurende die Giro d’Italia gesterf het.
Die oomblik toe Farrar oor die eindstreep gejaag het, het hy ’n W met sy hande gevorm.
Die skofsege was ’n briljante spanpoging. Oor die laaste kilometer het Hushovd, die wêreldkampioen, gesorg dat Farrar sy kragte in die glystroom agter hom kon spaar.
Toe Hushovd moeg raak, het die Nieu-Seelander Robbie Dean die Amerikaner se “beskermengel” geword.
“My spanmaats het hul werk so goed gedoen. Ek was in die bevoorregte posisie om net oor die laaste 150 m regtig vinnig te moes jaag,” het Farrar in ’n televisie-onderhoud gesê.
“Dit is ongelooflik om te dink die wêreldkampioen het my gehelp om my eerste skof in die Tour te wen. Dié skofsege beteken regtig baie vir my, want ek droom al so lank daaroor.”
Dinsdag se skof is van Lorient na Mûr de Bretagne (172.5 km).
Vir die jongste sportnuus volg Nuus24Sport op Twitter.
– Sport24