Tweede fietsrytitel in 8 dae vir Evans
2010-03-01 08:09
Graskop - Kevin Evans (MTN-Energade) is besig om ’n gewoonte daarvan te maak om Suid-Afrikaanse titels op sy fiets los te trap.
Saterdag in Sabie het Evans die Suid-Afrikaanse ultra-marathon-bergfietsren oor 115 km gewen.
Dit is die tweede keer in agt dae dat hy ’n nasionale fietsry-titel wen.
Hy is ook die Suid-Afrikaanse individuele tydtoetskampioen.
Evans het in die ultra-marathon van meet af aan die pas warm gemaak.
“Ek het besluit ek gaan nie toelaat dat die ander ryers sake dikteer nie en dat aanval die beste vorm van verdediging is.
Daarom het ek teen die eerste klim voor begin jaag,” het Evans gesê.
“Burry Stander het my gehelp. Aan die bopunt van die klim was ek en hy alleen voor.
“Ek het teen die laaste klim vir Burry weggery.”
Evans het in 4 uur, 32 minute en 33 sekondes gewen. Stander (Specialized-Mr Price) was tweede en David George (SAFindit) derde.
George se vertoning verdien vermelding. Sy probleme het in die eerste paar kilometer begin toe ’n ander ryer in hom vasgejaag het. Dit het daartoe gelei dat sy skoen se hak losgeskeur het.
George moes stop, gaan sit en sy skoen uittrek om dit reg te maak. Hy het amper 5 minute verloor, maar steeds was dit nie die einde van sy probleme nie.
In sy haas om die voorlopers in te haal, het hy op die verkeerde roete beland. Gelukkig het ’n beampte gesien wat gebeur en hom betyds gewaarsku om om te draai. George was toe heel laaste.
“Om van heel laaste tot derde kom, is seker nie sleg vir ’n ou man soos ek nie, maar ek het Sabie toe gekom om te wen,” het George agterna gesê.
Yolandé Speedy (MTN-Energade) het die Suid-Afrikaanse vrouemarathon oor 75 km in 3 uur, 27 minute en 10 sekondes gewen.
Karien van Jaarsveld (Natro) was tweede en Carla Rowley (RBS Biogen) derde.
- Beeld