Transformasie kan nie omseil word, sê Mbalula

2012-06-09 08:22

Kaapstad – Fikile Mbalula, die minister van sport, het sportverenigings Vrydag gewaarsku dat hulle deur die regering dopgehou word om seker te maak dat transformasie wel plaasvind.

"Almal moet weet die Loerbroer hou hulle dop en niemand gaan hierdie ding omseil nie," het hy aan verslaggewers in Kaapstad gesê ná die eerste byeenkoms van die Eminent Persons Group on Transformation in SA.

"Sport moet deur almal geniet word. In 10 tot 20 jaar, hoop ek dis nooit weer nodig om oor die kwessie van transformasie te praat nie."

Dié nuwe kommissie sal verseker dat kwotastelsels toegepas word om transformasie in sport te bevorder.

Ook skolesport is in dié nuwe groep se visier.

"Skolesport is die fondament van wat die regering moet behaal... Ons leef in 'n land waar, uit elke 100 studente wat uit die skoolstelsel vir minderbevoorregtes kom, net een na hoë-verrigting-sport sal vorder."

Mbalula het gesê dis tyd om verby akademiese debatte oor transformasie te beweeg en om te begin optree.

– Vir die jongste sportnuus volg Nuus24Sport op Twitter.