Tour-ongeluk: Jaer kry 33 steke
2011-07-11 15:20
Kaaptad – Die Nederlandse fietsryer Johnny Hoogerland moes 33 steke aan sy bene kry nadat hy Sondag tydens die negende skof van die Tour de France deur 'n media-motor getref is.
Hoogerland en Juan Antonio Flecha was deel van 'n vyfman-groep wat weggebreek het tydens die 208 km-skof vanaf Issoire na Saint-Flour in Frankryk.
Maar sowat 35 km voor die eindsreep is die twee deur 'n Franse media-motor getref, wat vir 'n boom langs die pad uitgeswaai het toe dit die jaers wou probeer verbysteek.
Hoogerland het deur die lug gevlieg en op doringdraad te lande gekom terwyl Flecha hard met die teerpad kennis gemaak het.
Albei jaers het die skof voltooi.
Die Tour de France-direkteur Chirtian Prudhomme het gesê die media-motor is uit die Tour geskop.
Vir die jongste sportnuus volg Nuus24Sport op Twitter.
– Sport24