Tour-jaers eet teer
2011-07-07 08:20
Kaapstad – Mark Cavendish (HTC-Highroad) is steeds een van die wêreld se vinnigste fietsryers.
Hy het dit Woensdag bewys toe hy die Tour de France se vyfde skof (164.5 km) van Carhaix na Cap Frehel gewen het. Dit was dié Britse jaer se 16de skofsege die afgelope vier jaar.
Dié sege is beslis een van Cavendish se bestes, want hy moes oor die laaste paar kilometer kophou en ’n barshou trap.
Met sowat 300 meter oor, was hy in die 10de plek, maar hy het geweier om bes te gee.
Hy het Philippe Gilbert (Omega-Pharma-Lotto) en Jose Rojas (Movistar) 20 meter voor die eindstreep verbygesteek. Sy wentyd was 3 uur 38 minute en 32 sekondes.
“Taai, baie taai,” is hoe Cavendish sy skofsege in ’n televisie-onderhoud beskryf het.
Volgens Cavendish het die Tour-organiseerders uit hul pad gegaan om die toestande in die bondelnaelritte na die einde so moeilik moontlik te maak.
“Ek dink hulle het dit gedoen omdat ek en my spanmaats die afgelope paar jaar die Tour se bondelnaelritte oorheers het.”
Thor Hushovd (Garmin-Cervelo) is steeds die algehele voorloper. Cadel Evans (BMC) is tweede, een sekonde stadiger.
Frank Schleck (Leopard-Trek) is derde, vier sekondes stadiger.
’n Erge dwarswind het Woensdag die grootste gedeelte van die skof vir die jaers bemoeilik en verskeie jaers het geval.
Alberto Contador (Saxo Bank), driemalige Tour-wenner, was een van die slagoffers. Hy was erg omgekrap toe hy opgestaan het.
In ’n oomblik van woede, het hy sy fiets in ’n sloot gegooi, langs die pad gestaan en wag vir sy spanmotor om vir hom ’n nuwe fiets te bring.
Gelukkig het Contador min moeite ondervind om weer die ander jaers in te haal. Hy het selfs tyd gehad om met sy duim omhoog vir die televisie-kamera te wys hy makeer niks nie.
Die RadioShack-span het ’n moeilike dag beleef, want verskeie van sy jaers het neergeploeg. Jani Brajkovic is sodanig beseer dat hy met ’n ambulans na die hospitaal geneem is.
Tom Boonen (Quick Step), voormalige wêreldkampioen en wenner van die groentrui, was ook ’n slagoffer.
Vir die res van die skof, was hy in ’n groot stryd teen die stophorlosie gewikkel om die skof betyds klaar te maak. Dit is ’n ope vraag of Boonen die toer gaan voltooi, want hy het dalk ’n sleutelbeen gebreek.
Donderdag se skof van Dinan na Lisieux (226.5 km) is die Tour se langste. ’n Kort en steil klim, sowat 1.5 km van die einde, kan sake vir die naelryers bemoeilik.
Vir die jongste sportnuus volg Nuus24Sport op Twitter.
– Sport24