Toer van SA vind wel plaas
2011-10-06 09:24
Kaapstad – Cell C se Toer van Suid-Afrika vind wel aanstaande jaar plaas.
Dié versekering is Woensdag deur Julian Bryant van Match World gegee.
Suid-Afrika se enigste internasionale fietstoer sal glo einde Februarie plaasvind.
Wat pla, is die absolute geheimhouding rondom die toer.
Op die toer se amptelike webwerf verskyn daar nie ’n enkele woord oor aanstaande jaar se planne nie. Daar word nie eers genoem dat die toer weer sal plaasvind nie.
Daarenteen het die organiseerders van die Giro d’Italia, wat eers in Mei aanstaande jaar plaasvind, reeds Woensdag op cyclingnews.com ’n volledige uiteensetting gegee van wanneer en waar sy skofte plaasvind.
Toe Greg Till, voorsitter van Fietsry Suid-Afrika (FSA), Woensdag gevra is of die toer plaasvind, was sy antwoord dat hy nie weet nie, want hy dien nie op die komitee wat gemoeid is met die toer se reëlings nie.
Barry Mocke, hoofbestuurder van die Cell C-toer, het ’n navraag met drie sinne in ’n e-pos beantwoord: “Die Cell C Toer van Suid-Afrika se roete gaan waarskynlik elke jaar verander. Dit beteken ons oorweeg in dié stadium nuwe roetes.
“Die finale besluit sal eers later geneem word en die inligting oor die toer sal op ’n geleë tyd aan die media bekend gemaak word,” het Mocke geskryf.
Sport24 het betroubaar verneem dat die toer se roete beslis verander gaan word. Vanjaar se toer het in Pretoria begin en is in Port Elizabeth hervat.
Aanstaande jaar se toer sal iewers in Gauteng begin, maar daar gaan meesal in Mpumalanga en KwaZulu-Natal gejaag word.
Die toer geniet steeds internasionale status, wat beteken dat internasionale spanne in aksie sal wees.
Een van die groot probleme in vanjaar se toer was dat die breë publiek nooit behoorlik ingelig is nie.
Dit het tot grootskaalse frustrasie gelei by mense wat net met hul normale dagtake wou voortgaan.
Die tweede skof in Sandton moes juis gestaak word omdat motoriste eenvoudig nie vir die fietsryers wou wag nie.
Vir die jongste sportnuus volg Nuus24Sport op Twitter.
– Sport24