Tennis se top-spelers dreig met staking
2011-09-21 09:29
Londen. – Die voorste tennisspelers in die wêreld sal nie huiwer om te staak as beamptes nie aandag gee aan die verbetering van die beknopte tenniskalender nie, het Andy Murray Maandag gewaarsku.
Top-spelers word jaar ná jaar onderwerp aan ’n taai seisoen wat vier Grand Slam-toernooie, agt Meesters1000-verpligtinge, die jaareind-wêreldtoer en ’n klomp kleiner toernooie insluit.
Spelers kla al vir jare daaroor – Rafael Nadal het byvoorbeeld al in 2009 gevra dat die druk op spelers verlig word.
Die kwessie word egter nou op die spits gedryf, ná slegte weer by die onlangse Amerikaanse Ope sommige spelers gedwing het om drie enkelspelwedstryde in drie dae te speel ten einde die halfeindronde te bereik.
Murray en Nadal is die hardste hierdeur getref.
Nou meen Murray dat ’n volgepakte skedule nie verder uitgewerk mag word deur ouens wat nooit ’n raket swaai nie.
Die tyd het gekom vir spelers om te rebelleer, en Murray kyk glad nie verby die moontlikheid van ’n komende grootskaalse staking nie.
“Dis ’n moontlikheid,” het die nr. 4-speler op die wêreldranlys Maandag aan die BBC gesê.
“Ek weet uit gesprekke met ander spelers dat hulle nie bang is om dit te doen nie. Kom ons hoop dit gebeur nie, maar ek is seker die spelers sal dit oorweeg. Ons wil net hê ’n paar dinge moet verander – klein goedjies. Twee of drie weke (af) in die jaar, ’n paar toernooie minder ... Ek dink dis redelik.”
Verlede November het die ATP-hoof, Adam Helfant, aangekondig dat daar van 2012 af ’n afseisoen van sewe weke sal wees.
Die skuif beteken sekere toernooie sal herskeduleer word, maar die spelers se aantal verpligtinge sal nie verminder nie.
Die beheerliggaam van vroue-tennis (die WTA) het hul seisoen ’n paar jaar gelede verkort, sodat spelers soos Serena Williams en Caroline Wozniacki van 7 November tot 2 Januarie sal kan uitspan.
In teenstelling daarmee sal spelers soos Nadal (wat Spanje waarskynlik in die Davisbeker-eindstryd teen Argentinië sal verteenwoordig) eers teen 5 Desember kan ontspan, en daarna weer in die eerste week van Januarie speel.
In ’n verklaring van die ATP-reeks is gesê die spelers se welstand is “van groot belang” en dat hy “toegewyd bly om ... die kwessies op te los”.
Vir die jongste sportnuus volg Nuus24Sport op Twitter.
– Sport24