Taai stryd wag op bergfietsryers
2010-03-02 14:04
Johannesburg - Die sesde jaarlikse Subaru Sani2c-bergfietstoer, een van Suid-Afrika se mees gewilde bergfietstoere, sal weer die bene van top plaaslike én internasionale fietsryers toets wanneer dit die week afskop.
Altesaam 1 500 spanne wat elk uit twee fietsryers bestaan sal by die Underberg-skool in Scottburgh, KwaZulu-Natal, begin en ‘n totale afstand van 271 km oor drie dae aflê.
Die Sani2c en die Sani2c Avontuur-bergfietswedrenne, wat onderskeidelik vanaf 3-5 Maart en 4-6 Maart sal plaasvind, bevat vanjaar 'n waglys van meer as 2 500 spanne.
Kevin Evans, wat deel was van verlede jaar se wenspan saam met David George, is vanjaar terug in die saal. Sy MTN-spanmaat is die wêreldmarathon-kampioen Alban Lakata.
Burry Stander, wat tans die o.23 wêreldmarathon-kampioen is, sal saam met Ben Melt Swanepoel ry om die Specialized-span te verteenwoordig.
Die krieketlegende Jonty Rhodes en sy broer Clint, asook die voormalige Springbok-rugbyspeler John Allen, tel onder die sportpersoonlikhede wat ook aan vanjaar se Sani2c gaan deelneem.
Craig Wapnick, die organiseerder van die Sani2c, het gesê: “Die gewildheid van bergfietsry het in die laaste paar jaar drasties toegeneem met soveel as 25 bergfietsryers wat elke padfietsryer verteenwoordig."
- Sapa