‘Swart dag’ vir fietsry: Giro nie op kalender
2010-11-23 09:42
Pretoria - Die Giro del Capo, een van Suid-Afrika se oudste fietstoere, sal in 2011 – ná 19 jaar – nie plaasvind nie omdat die organiseerders nie ’n borg kon vind nie.
Dave Bellairs, die organiseerder, het dié nuus as ’n swart dag vir Suid-Afrikaanse fietsry bestempel.
“Ek het die afgelope paar maande alles in my vermoë gedoen om ’n borg vir die toer te probeer kry, maar dit was vergeefs. Niemand stel belang nie.”
Bellairs meen die bestuur van Fietsry Suid-Afrika (FSA) is deels te blameer vir die feit dat die Giro nie gaan plaasvind nie.
“Wat my betref, is dit ’n fout om twee internasionale fietstoere binne ’n week in Suid-Afrika te probeer aanbied.
“Hierdie is nie Europa waar jy week ná week groot toere kan aanbied nie.
“Die wrede werklikheid is dat daar in Suid-Afrika nie genoeg belangstelling in fietsry is nie.
“Moenie my verkeerd verstaan nie, ek is baie bly dat die Toer van Suid-Afrika eindelik ’n werklikheid gaan word. Dit gaan ’n opwindende toer wees.
“Ek dink net die bestuur van FSA moes oor die datums van die twee toere besin het.
“As dit my besluit was, sou ek die een toer net voor of ná die Argus laat plaasvind het en die tweede toer net voor die 94.7. Dit is wanneer daar in Suid-Afrika die meeste belangstelling in fietsry is.
“Die maatskappye met wie ek onderhandel het om die Giro te borg se grootste vrees was dat die media nie oor albei toere ewe volledig verslag sou kon doen nie.”
Volgens Bellairs het hy nog nie heeltemal opgegee nie.
“Die Giro sal beslis nie aanstaande jaar plaasvind nie, maar ek het ’n nuwe idee vir die toer. Hopelik vind die Giro weer van 2012 af plaas.
Greg Till, voorsitter van FSA, sê dit is vir hom vreemd dat Bellairs sê daar kan nie twee fietstoere kort ná mekaar in Suid-Afrika aangebied word nie.
“Almal met wie ons in internasionale fietsry onderhandel het, was baie opgewonde oor die vooruitsig om in een maand in
Suid-Afrika aan drie internasionale toere – die Giro del Capo, die Toer van Suid-Afrika en die Cape Epic – deel te neem.
“Hoe meer toere ons in Suid-Afrika kan aanbied, hoe beter is dit vir fietsry. Ek dink net ’n mens moet realisties wees. Die ekonomie is nie op die oomblik wat dit moet wees nie.”
Bly op hoogte van al die jongste sportnuus deur Nuus24Sport op Twitter te volg.
- Sport24