Swart armbande by Argus gedra
2010-03-10 11:00
Kaapstad - Duisende fietsryers sal swart armbande by die Cape Argus Pick n Pay-fietstoer dra ter nagedagtenis aan die drie fietsryers wat Maandag buite Oudsthoorn deur ‘n motoris doodgery is.
Frank Nel (60), Jan Elloff (73) en Magda van Lill (50) is op slag dood toe die bondel waarin hulle gery het, deur ‘n bakkie wat ‘n vragmotor wou verbysteek, getref is.
“Dit is nog ‘n tragiese ongeluk wat vermy kon word,” het Hendrik Lemmer namens Fietsry Suid-Afrika (FSA) gesê.
“Ek wil graag namens FSA ons medelye teenoor die families van die fietsryers wat gesterf het uitspreek. Ek wil ook hê hulle moet weet dat die swart armbande wat ons Sondag gaan dra meer as net ‘n teken van medelye is, maar ook ‘n belofte om daadwerklik iets te doen oor die gebrek aan algemene bewustheid van fietsryers op ons paaie," het Lemmer gesê.
Lemmer het gesê FSA is toegewyd om saam met die regering te werk om paaie veiliger vir fietsryers te maak.
‘n Aankondiging is ook Dinsdag gemaak dat een van Suid-Afrika se top professionele fietsryers, Daryl Impey, as die beskermheer van Sign-Up gekies is.
Sign-Up is 'n nasionale veldtog wat fondse insamel om “Pas op fietsryer”-tekens, wat deur die regering goedgekeur is, langs gewilde fietsroetes regoor die land op te rig.
Impey jaag saam met Lance Armstrong vir die Radioshack-span en is besig om veral op internasionale vlak aandag te trek.
- Sapa