Sunette skitter met spies vir SA
2011-08-19 07:01
Pretoria – Sunette Viljoen het Donderdag op die Wêreld-studentespele in Sjenzen, China, die Afrika- en Suid-Afrikaanse rekord verbeter toe sy haar spies 66.47 m deur die lug laat trek en goud verower het.
Viljoen het twee jaar gelede op die Studentespele in Belgrado ook met ’n rekordgooi vorendag gekom om die goue medalje te wen.
Haar wenafstand was toe 65.43 m.
Marina Maximova van Rusland was gister tweede met ’n gooi van 59.87 m en Justine Robbeson van Suid-Afrika derde met 59.78 m.
Dit is die tweede keer in twee jaar dat Viljoen een van haar internasionale spiesgooititels suksesvol verdedig.
Op verlede jaar se Statebondspele in Indië het sy die tweede keer ’n goue medalje verower.
Sy het verlede jaar in Praag 66.38 m gegooi, wat ook ’n rekord was.
Wat haar groot poging in China opwindend maak, is dat dit nege dae voor die Wêreldbyeenkoms in Daegu, Suid-Korea, gebeur het.
Haar nuwe rekord-afstand is die sewende beste gooi in internasionale atletiek.
Net Barbora Spotakova (Tsjeggiese Republiek, 69.45 m), Christina Obergföll (Duitsland, 68.86 m) en Maria Abukomava (Rusland, 67.98 m) het vanjaar verder gegooi.
Viljoen en Terseus Liebenberg, haar afrigter, verdien punte vir die wyse waarop hulle voorberei het.
Tot voor gister het Viljoen vanjaar nie regtig die wêreld aan die brand gegooi nie.
Haar beste poging van 61.72 m in Ostrava was nie juis iets om oor opgewonde te raak nie. ’n Mens het die idee gekry dat sy sukkel om 60 m te haal.
Toe Viljoen ’n paar weke gelede gevra is wat skort, was haar antwoord: “Daar skort niks nie. Ek oefen goed en ek het geen beserings nie. Hou maar net dop. Daar kom ’n groot gooi.”
Wenda Theron was gister vyfde in die 400-hekkies in 56.76 s.
Anna Yaroschchuk van die Oekraïne het in 55.15 s gewen.
– Sport24
– Bly op hoogte van al die jongste sportnuus deur Nuus24Sport op Twitter te volg