Stofile verklaar oorlog oor Caster
2009-09-11 14:02
Pretoria - Makhenkesi Stofile, minister van sport en ontspanning, het 'n oorlog verklaar as die Internasionale Vereniging van Atletiekfederasies (IAAF) Caster Semenya by kompetisies uitsluit omdat sy 'n hermafrodiet is.
Stofile het Vrydag gesê dit sal onregverdig wees om Semenya te verhoed om as 'n vrou aan kompetisies deel te neem.
Hy het tydens 'n mediakonferensie aangekondig dat Semenya se geslagstoetse toon sy is met albei geslagsorgane gebore.
"Ek dink dit sal die Derde Wêreldoorlog wees. Ons sal tot die hoogste vlak gaan om só 'n besluit teen te staan. Dit sal heeltemal onregverdig wees."
Stofile se departement is besig om regsadvies in te win oor Semenya se regte wat in die proses geskend is.
"Die ministerie is teleurgesteld oor die manier waarop die situasie hanteer is, veral nadat die IAAF 'n vergadering saamgeroep het."
"Niemand twyfel nou meer oor haar geslag nie. Nou is die kwessie die persentasies van haar geslag. Dit is oneties en walglik."
Stofile het gesê Semenya ís 'n meisie al bevestig verslae dat sy tweeslagtig is.
"Die toetse toon dat sy tweeslagtig is. Vir my beteken dit niks. Waar is die wetenskap dat hermafrodiete 'n voordeel het? Ek dink nie sy is 'n vrou nie. Sy is maar net 'n kind wat dit geniet om groot te raak."
IAAF het vroeër gesê Semenya se wêreldtitel sal nie van haar af weggeneem word nie, maar het bevestig dat vier ander atlete in soortgelyke situasies gevra is om hul loopbane te beëindig.
Die 18-jarige wêreld 800m-kampioen het volgens berigte in die Daily Telegraph nie 'n baarmoeder of eierstokke nie.
Dié koerant in Australië het 'n anonieme bron aangehaal wat die inligting rondom Semenya se geslagstoetse bekendgemaak het. Volgens die IAAF moet die uitslae van die toetse eers in November bekendgemaak word.
Semenya gaan glo aangeraai word om so spoedig moontlik ’n operasie te ondergaan omdat haar toestand baie ernstige gesondheidsgevare inhou.
Luidens dié berig het die toetse ook aan die lig gebring dat Semenya interne testikels het wat testosteroon vervaardig. Sy het glo drie keer meer testosteroon as ander vroue-atlete.
Semenya is sedert verlede maand in 'n herrie oor haar geslag gedompel nadat sy die 800m in 1:55.45 by die Wêreldbyeenkoms in Berlyn kafgedraf het. Dit is die vinnigste tyd in die wêreld vanjaar.
Die IAAF het toe ongeag Semenya se prestasie op 'n geslagstoets aangedring.
Intussen het pres. Jacob Zuma in Semenya se verdediging gesê die media het haar privaatheid geskend.
"Ons het 'n meisie wat (aan 'n atletiekbyeenkoms) deelgeneem en gewen het. Ek dink nie ons moet met mense se lewens en hul privaatheid speel nie."
"Hoekom kan ons nie die privaatheid tussen 'n dokter en sy pasiënt respekteer nie? Ons het 'n situasie in die land waar ons sê ons respekteer mense se privaatheid en hul regte, maar dan doen ons presies die teenoorgestelde."
Zuma was by 'n mediakonferensie in Kleinmond na 'n vergadering met die leiers van die Europese Unie.
– Sapa