Stoei sy Olimpiese status kwyt

2013-02-12 17:58

Lausanne – Die Internasionale Olimpiese komitee (IOK) het besluit dat stoei moet plek maak vir 'n nuwe sportsoort by die 2020 Olimpiese Spele, het 'n amptenaar Dinsdag bevestig.

In 'n verrassende skuif het die uitvoerende raad van die IOK gekies om moderne vyfkamp – die sport wat die meeste in gevaar was om sy plek op die Olimpiese program te verloor – te behou en eerder stoei te verwyder, het die amptenaar gesê.

Moderne vyfkamp is deel van die Olimpiese program sedert die 1912 Spele in Stockholm.

Die amptenaar het op voorwaarde van anonomimiteit gepraat omdat die besluit nog nie amptelik aangekondig is nie.

Die IOK het 26 sportsoorte op die huidige Olimpiese program geëvalueer.

Een sport word weggelaat sodat die IOK toegelaat kan word om 'n nuwe sportsoort later vanjaar by die Olimpiese program by te voeg.

Stoei sal nou saam met sewe ander sportsoorte moet aansoek doen om as 'n bykomende sport gekies te word vir die 2020 Spele-program.

Golf en rugby is die nuwelinge en sal by die 2016 Spele in Rio de Janeiro aansluit.

Lees verder.

Vir die jongste sportnuus volg Nuus24Sport op Twitter.