Steeds geen woema in SA-marathon
2011-02-14 09:37
Pretoria - Die gebrek aan diepte in Suid-Afrikaanse marathonwedlope is Sondag in George weer uitgewys toe Lusapho April maklik in 2 uur 13 minute en 21 sekondes gewen het.
Coolboy Ngamole was tweede 2:14:29 en Benedict Moeng derde in 2:16:10.
Dit is verblydend dat April se wentyd byna drie minute vinniger as Ngamole se wentyd van verlede jaar is. Ngamole se tyd is ook sy beste nog.
Maar as daar ooit ’n dag was waarop ’n Suid-Afrikaanse atleet werklik weer ’n slag ’n vinnige tyd in ’n plaaslike marathon kon hardloop, was dit gister. Die atlete kon nie om beter weersomstandighede gevra het nie. Dit was koel en windstil op ’n plat roete.
Die atlete het die eerste 14 km in 45:42 afgedraf, maar ná 28 km was dit duidelik dat net April of Ngamole ’n kans sou hê om te wen nadat al die ander atlete begin uitsak het.
April het stadigaan Ngamole begin agtergelaat. Die oomblik toe hy seker was dat hy gaan wen, het tyd nie meer saak gemaak nie. Toe was dit vir hom ’n geval van draf net tot die wedloop klaar is en steek die R50 000 as wenner in sy sak.
Kenners meen April kan die eerste atleet sedert 2000 word wat ’n marathon in Suid-Afrika in minder as 2:12:00 wen, maar dan moet iemand hom end-uit bly jaag.
Soos verwag is, het Charné Rademeyer die vroue-wedloop gewen. Haar wentyd van 2:44:44 is egter niks om oor opgewonde te raak nie. ’n Mens kan maar net wonder wat sou gebeur het as René Kalmer, Irvette van Blerk, Tanith Maxwell en Annerien van Schalkwyk deelgeneem het.
Nick Bester, ’n voormalige Comrades-wenner wat die afgelope paar jaar ten nouste by Suid-Afrikaanse padatletiek betrokke is, skryf die teleurstellende vertonings toe aan die feit dat plaaslike marathon-atlete te gemaklik is en hulle kan ook nie beplan nie.
“Die atlete se fokus is totaal verkeerd. Ek weet van ’n atleet wat verlede week ’n marathon in Sasolburg gewen het en dan verwag hy om steeds op die nasionale byeenkoms goed te vertoon,” sê Bester.
“Enigeen wat iets van padwedlope af weet, sal besef jy kan nie op twee agtereenvolgende naweke mededingende tye in ’n marathon hardloop nie.”
Bly op hoogte van al die jongste sportnuus deur Nuus24Sport op Twitter te volg.
- Sport24