Stander was 'n 'ware heer'
2013-01-04 07:20
Kaapstad – Die SA Sportkonfederasie en Olimpiese Komitee (Saskok) het Donderdag die dood van die fietsrylegende Burry Stander in 'n padongeluk in KwaZulu-Natal betreur.
Stander is Donderdagmiddag vermoedelik deur ’n taxi doodgery terwyl hy op ’n oefenrit was.
Fietsry Suid-Afrika het bevestig dat Stander (25) deur ’n voertuig getref is by Shelly Beach aan die KwaZulu-Natalse suidkus. Hy is op die toneel dood.
"Dis inderdaad verskriklike nuus om 2013 mee te begin. Burry was die toonbeeld van 'n Olimpiese atleet – talentvol, uiters mededingend, maar terselfdertyd baie nederig en 'n ware heer," het Gideon Sam, president van Saskok, gesê.
"Saskok, die fietsrywêreld en die hele Suid-Afrikaanse sportgemeenskap betreur sy dood en stuur ons gebede aan sy vrou en sy familie.
Mike Finch, redakteur van Bicycling SA, het volgens Beeld gesê Stander is blykbaar voor sy fietswinkel, Concept Cyclery, omgery.
Sy pa, Charles, is die bestuurder en het die ongeluk hoor gebeur.
Kol. Jay Naicker, polisiewoordvoerder, het bevestig dat ’n saak van strafbare manslag ondersoek word. Niemand is nog in hegtenis geneem nie.
Deel jou herinnering van Stander of deel 'n boodskap van medelye in die kommentaarvenster hieronder.
– Volg Nuus24 op Twitter.
